Ka dam hman ang - Djokovic

Novak Djokovic-a'n an ram Serbia tan United Cup a khel a, singles match khelin Alex de Minaur a hneh lo - Serbia chu Australia lakah chak loin quartertfinal-ah an zinkawng a tawp.

Serbia chak loh aiin Djokovic-a banrek hliam chuan sawi zui a hlawh. World number 1 hi De Minaur lakah hian 6-4, 6-4 in a chak lo a, an inkhelh laklawh laiin a banrek hi enkawl lailawk a ngai, match khel tluan mah se duhthusama dam erawh a ni lo.

Australia ram chhungah bik chuan kum ruk hnuah a vawi khat nan Djokovic hi a chak lo. Australian Open khelh ṭan hma ni 11 chauh awm tawhah a hliam tihna a ni a, hei hian zawhna tam tak a siam phah.

Australian Open vawi 10 champion tawh Djokovic chuan, "Zep tur a awm lo - Australian Open tir lamah chuan ka taksa leh rilru hi 100% a inpeih a ni hman khel lo ang, mahse ka dam hman ngei erawh ka beiseina a sang hle.

"Service bakah forehand hman dawnin ka banrek a na ṭhin a, beisei anga ka dam a nih chuan Australian Open tir lamah pawh ka inpeih hman ang," a ti. Tuna a lan dan chuan Grand Slam atana inbuatsaihna tournament dang a khel hman dawn lo niin a lang.

Kum 36 mi Djokovic tan Australian Open hi hmun hlu bik a ni a, kuminah pawh a inlan thei a nih chuan champion tura rinkai a ni leh ang. Chutihrualin, a hliam a dam fel lo a nih erawh chuan thil a awlsam dawn lo thung a ni.

Tennis season khat chhunga Grand Slam hmasa ber hi January 14-28 chhung hian Melbourne Park-ah an inkhel ang. Beisei anga thil a thleng a nih chuan hard court inelna lianah hian Rafael Nadal pawh a inlan dawn.