Kings lakah Magic an tlawm

Nimin zing NBA regular season inkhel hmuhnawmah Sacramento Kings chuan Orlando Magic 138-135 in an hneh a, an chak theih nan De’Aaron Fox chuan over time chawhnu lamah point nga neiin a ṭangkai hle.

Kings an chak theih nan Domantas Sabonis-a'n triple-double (22 points, 23 rebounds leh 12 assists) neiin a ṭangkai hle a, a chak lo zawk Magic tan Paolo Banchero chuan point 43 neiin a chet ṭhat ber ṭum tawng mah se a team chakpui nan a tawk zo lo.

Inkhel dangah Miami Heat chuan Nikola Jovic leh Bam Adebayo-a te point 15 ve ve hmangin Los Angeles Lakers chu 110-96 in an hneh a, point nei hnem ber erawh Tyler Herro (21 points) niin, kum 22 mi Jaime Jaquez Jr. chuan point 16 a thawk chhuak ve bawk.

LeBron James (12 points) leh Anthony Davis (29) te nei mah se season hmasa ang bawkin Lakers an che hleithei lo, season kal laiah vawi 18 ngawt an tlawm tling ta, an chak zat aiin an tlawm zat hi match khat in a tam zawk hial.

Cleveland Cavaliers erawh an chak nuamsa, point 140 ngawt an nei. Cleveland hian Washington Wizards lakah 140-101 in hnehna an chang thei a, tun season kal laia point an nei tam ber ṭum a nih bakah, in hnehna zat point a tam ber ṭum an tawng.

Houston Rockets chuan Brooklyn Nets lakah 112-101 in hnehna an chang a, inkhel dangah Los Angeles Clippers pawhin Phoenix Suns chu 131-122 in an hneh ve bawk.

Western Conference hma-hruaitu Minnesota Timberwolves an chak laiin an hnuai chiaha awm Oklahoma City Thunder erawh Atlanta Hawks lakah an tlawm thung a ni.