Quarterfinal-ah Gauff a lut

Australian Open inbuatsaihna tournament zinga mi Auckland Classic khelh laiah, champion nomawi kawl mektu Coco Gauff chuan Brenda Fruhvirtova lakah nuamsa tak 6-1, 6-1 a hnehin changin quarterfinal a in vaw kai.

Nimin inkhelah US Open champion lai ni bawk Gauff hian a service hmasa ber a hloh a, a service vawi thumnaah a khingpuiin break point vawi hnih a hmu bawk - kum 16 mi Fruhvirtova a che thei viau dawn niin a lang hman.

Mahse, American tleirawl Guaff a chesual nawn lo, service hloh ve zeuh nei mah se set hnih an khelh chhungin game hnih bak chu a la fai vek a, tawnhriat nei tlem Czech Republic nula Fruhvirtova tan tih theih dang a awm lo.

Kum 19 mi Gauff chuan, "Fruhvirtova khan a bul a ṭan funin ka lu pawh a hai hman hle. Mahse, ka nihna tak ka lantir chhunzawm thei a, inkhel pumpui thlir chuan ka khel ṭha zawk hleah ka ngai, ka service pawh a hmasa bera a fuh tawk lo bak chu a dik hleah ka ngai," a ti.

Gauff hian a match lehpekah chuan world number 42 Varvara Gracheva a hmachhawn leh ang, nomawi humhim tur chuan match hmabak pathumah a chak vek a la ngai dawn tihna a ni.

Inkhel dangah seeded pasarihna Petra Martic pawh a chak. Croatian nula hian Chinese nula Yue Yuan-i chu 6-2, 6-2 in a hneh a, a match lehpekah chuan Emma Raducanu hnehtu seeded pahnihna Elina Svitolina a tum ve leh thung ang.