Tunlai Football leh 'Full-Back' Pep Guardiola leh Philipp Lahm thlirna

Football khelh dan kalhmang a danglam fo a, player 11 ten ball an inchuh dan leh khingpuite an nawr dan te, anmahni lama goal lut tur an ven dante chu a danglam fo ṭhin, an khelh dan a danglam avangin position tina an chet vel dan pawh a ngai reng thei lo.

Tun hnai bik kan thlir a nih chuan football huang chhungah 'full-back' hi a danglam nasa ber tiin a sawi ngam ang, inkhel kalhmang thlaktu langsar tak a ni a, goal ven chauh ni loin a nawr kawngah mawhphurhna an neih belh nasat avangin an pawimawhna a zual tia sawi theih a ni.

Tun hma deuh kha chuan, full-back hi defender pali intlar zingah chuan hna hautak leh thahrui hman ngaih nasatna tia sawi ṭhin a ni a, player pakhat leh pakhat inven bakah an hma zawna awm winger puih kha an mawhphurhna a ni tel a, a hnung leh hma lam an kar tawn zak zak ṭhin.

An mawhphurhna a sang kan tih rual hian tunlai hian a san belh tiin a sawi ngam. Thui tak pawh en let kher a ngai lo - Gary Neville leh Ashley Cole te khelh dan leh tunlaia John Stones, Oleksandr Zinchenko leh Trent Alexander-Arnold te khelh dan chu a danglam daih tawh.

Germany leh Bayern Munich full-back Philipp Lahm kha tunlaia an hman lar 'inverted full-back' atan hman hmasak a ni a, kum 2013 khan Pep Guardiola kaihhruaina hnuaiah a lo khel ṭan tawh a, a hnung zuitu an awm chho zel.

Lahm khan Bayern Munich tan nomawi 21 a chawi a, heng zingah hian Champions League telin an ram Germany chu World Cup a lakpui bawk. Tunlai full-back khelh dan tihmasatu a ni pawh hi a mak lo, player danglam bik kha a ni miau a.

Pep-a thluak

Inverted full-back hmang tur chuan an team khan ball an chan tam a ngai a, tlarhnung sira awm player khan zalenna zau zawk neiin a sir aṭangin a laiah an tlan lut nasa a, midfied laiah hun hmang tamin ball semtu zingah an tel ṭhin.

Spanish manager Guardiola khan Bayern Munich a enkawl lai khan Lahm kha right-back ni mah se midfield atan a hmang fo a, mual laia ball sem tur pawha a rintlak miau avangin defender ni chung si khan zalenna a nei zau em em zel a ni.

Lahm chuan, "Kum 2000 bawr vel khan hetiang khelh dan hi kalpui a lo ni tawh a, chutihrualin kha tih hunlai kha chuan goal nawr leh ball sem aiin goal venhim lam kha dah pawimawh leh ngaih pawimawh a ni zawk. A hma lama tlan luh chuan ball kal dan thlak leh cross kha kan hna a ni ber.

"Pep Guardiola khan a kalhmang a rawn thlak a, tunah chuan full-back hian awmzia leh nihna hran a nei tawh ni berin ka hria. Goal venhim lamah te hian mimal lo dan aimahin hmun ruak pe loa lo inven kha a ni tawh zawk a, a nawr lamah pawh hmun ruak siam a ni bawk," a ti.

Tunlai coach tam zawk hian 4-3-3 formation hmangin an naute an khelh tir ṭhin a, inverted full-back an hman chiah hian goal an nawr hian 3-2-2-3 formation angin an awm thei ta ṭhin a, chu chuan an goal nawr a ti na zual em em ṭhin.

Zinchenko leh Arteta

Mikel Arteta hi Pep Guardiola hnuaiah Manchester City assistant manager a ni ṭhin a, a manager ngaihsan leh a hnampui ni bawk khelh dan leh kalphung hi tam tak entawn a nei a, chung zingah chuan 'inverted full-back' hi a langsar ber zinga mi a ni.

Arsenal manager a nih khan Man City aṭangin Zinchenko a lei a, Ukraine international defender hi left-back ni mah se a hun tam tak chu defensive midfielder bulah a hmang a, ball a ken theih bakah a pass thiam miau avangin a semtu pawimawh a ni phak.

Season hmasa khan Zinchenko hian Premier League match 27 a khel a, Arsenal player zingah an khingpui te goal bul hnai 'final third' bika ball pass dik hnem (26) ber niin, minute 90 zela chhutin Gunners player zinga ball khawih hnem ber a ni hial.

Lahm chuan, "Zinchenko hi ka player duh leh ngainat tak a ni. A khel ṭhain a hmuhnawm ṭhin a, coach Arteta tana chona lian tak siamsaktu a ni," a ti. German defender hian Arsenal defender khelh dan chu ṭha a tiin a ngaina hle.

Spanish coach chungchang sawi zuiin Lahm chuan, "Spanish coach-te hi chu ram dang coach chungah an awm rih, tuna football hmuhnawm kan tih ang hi kum 30 chhung an khel tawh a, khelh duh dan leh kalhmang fel tak an nei," tiin a sawi.

Arnold a lo lang

Trent Alexander-Arnold hi ball pet thiam bik zinga mi a ni a, mahse coach Jurgen Klopp-a'n zalenna a pe zau tawk lo deuh ṭhin a, tunah erawh zalenna a nei zau zual tawh. Kumin April thla khan Arsenal nen 2-2 in an inhnehtawk, he inkhelah hian midfield atan hman a ni.

Midfield lama Alexander-Arnold luh dan leh Zinchenko chet vel dan erawh a danglam hle thung. Klopp-a ruahman dan chuan, a player zinga ball pass thiam ber hi a laiah a awm tam ang a, chu chuan a sir lam leh hla deuha a ṭhiante zawng hmuin ball a pe chhuak dik tam thei ang, tih a ni thung.

Aston Villa nen an inkhelh ṭum khan, coach Unai Emery hian a defender-te a tawlh hma tir nasa ṭhin a, defender leh goalkeeper inkarah hmun awl a zau ṭhin, khami awlah tak khan Arnold hian hla taka awm Darwin Nunez leh Mohamed Salah te tan ball a pe dik chat ṭhin.

Arnold-a khelh dan phung an thlak aṭangin Liverpool hian Premier League match 27 an khel tawh a, point 62 an hlawh chhuak - hemi chhung hian Reds hi league point hlawh chhuak hnem ber an ni hial, a khelh dan an tidanglam hi an inchhir lo khawp ang.

Lahm chuan, "Ball sem leh thunun chauh a ni lo, mual lai aṭang chuan engkim a hmuh kim theih a, hei hi hruaitu ṭha ni tura thil pawimawh leh ṭangkai a ni bawk," tiin Liverpool Vice Captain chungchang a sawi a, a lakah beisei a nei sang hle bawk.

Thluak hman a ngai

Ball an chan tam a, inkhel an thunun chuan inverted full-back tan hna a harsa lutuk lo a ni mai thei. Mahse, ball an hloh a, an khingpui lamin counter attack hmanga na taka an beih let khan ven tur hmun an nei zau a, mualpho a awlsam hle.

Hetiang hunah tak hian inverted full-back chuan a thluak a hman thiam a ngai. Guardiola-a'n a player thawhpui tawh zinga fing ber a tih Lahm chuan, "Thluak hman a ngai a, rang tak takin thutlukna lian tham siam a ngai ṭhin bawk, ball kal vel dan tur thlirlawk thiam a ngai takzet.

"Chet ran chu thil pawimawh tak a nih rualin, kan khingpui lamin engtiang zawngin nge min beih dawn a, ball an kaltir dan tur chhut fuh a pawimawh. Mual sir leh vei lamah ka khel tawh ve ve a, ka sawi thiam dan berah chuan inngaihtuahna hun a awm lo," a ti.

Guardiola bakah Tottenham Hotspur manager Ange Postecoglou chu inverted full-back hmangthiam zinga mi a ni chho mek. Postecoglou hian a defensive midfielder Yves Bissouma lakah mawhphurna sang tak pein ball pawh an chan tam phah niin a lang.

Season kal laia an league match khelh tawh chinah Spurs hian ball possession 59% an nei, season hmasa khan chawhrualin 50% an nei. Manager thar hian Antonio Conte aiin 3-4-3 formation a hmang fuh rih niin a lang a, hmabak erawh an la nei thui hle thung a ni.