Kumin atan F1 inelna an tlan zo: A tawpah Max Verstappen a chak

Formula 1 season kal lai chu Pathianni zan khan tlan zawh a ni a, inelna hnuhnung ber Abu Dhabi Grand Prix-ah Max Verstappen chuan hnehna changin hnu a khar ṭha hle.

World champion Lewis Hamilton-a'n coronavirus hnehin inelna a hmachhawn leh thei tawh. Mercedes driver hi pathumnaah thlengin, a hmaah hian a teammate Valtteri Bottas leh Verstappen te an awm.

Season tir lamah Verstappen a che ṭha a, beisei pawh an nei sang hman. Mahse team ṭha Mercedes chuan Hamilton leh Bottas hmanga F1 thunun zuiin midang tan hmunawl an siamsak zui tawh lo.

Yas Marina Circuit a intlansiakah Max-a'n a hmasa ber aṭangin inelna bul a ṭan, awlsam takin hnehna chang mai bik lo mah se hun harsa tak a tawk hran lo, a tir aṭanga a tawp thlengin hma a hruai tluan thei.

Intlansiak hnuhnung zawkah Hamilton chu hri leng a kai vangin a inlan thei lo, season kharnaah erawh ṭha takin a tlan thei leh tawh. Britain tlangval chuan, "Hrisel leh dam taka inelna neih theih leh chu a nuam takzet.

"Hri ka kai lai pawh khan a hnual leh beidawn thlak zawngin engmah ka ngaihtuah duh ngai lo, tun ṭumah hian ka rilru leh taksa chu 100% in la inpeih kher lo mah se intlansiak nuam leh ṭha tak chu ka tawng," tiin a sawi.

Ruahman dan chuan 2020 Formula 1 season hi March thla khan Australia khawpui Melbourne a neih tur a ni, inelna hmachhawn tumin team pawh an zin lut hman tawh - mahse Covid-19 kai an awm avangin ṭhulh a ni a, a hnu lamah pawh a nghawng na hle.

Intlansiak vawi 21 neih tura an ruahman chu tih tlem a ngai a, thla nga leh a chanve chhungin vawi 17 zet an intlansiak hman. Silverstone leh Bahrain International Circuit-ah te chuan ṭum hnih ve ve inelna an nei hial a ni.

Team leh driver ten chawlh an nei rei dawn lo, ruahman dan chuan nakkum February thla chawhnu lam aṭangin in enchhinna an nei ṭan leh nghal ang. Thla khat leh a chanve vel chauh chawlh an nei dawn tihna a ni ang.

Season thar hi March thla laihawl hian Melbourne-ah bawk ṭan leh tum a ni dawn, amaherawhchu beiseina chauh a la ni. Hri leng hi engtikah nge a reh dawn hriat a la ni lo, damdawi a chhuak hman a nih pawhin ruahmanna an neih sa hi tih danglam a la ngai leh mai thei.