A lian dangte elphak tum Mourinho

Jose Mourinho chuan nikuma an match hnuhnung berah Juventus ngam lo mah se an thil tum a la pangngai reng tih a sawi. Italian football inelna sang berah hian a tiṭha zual pali zinga tel phak ngei an la tum tlat tih a sawi bawk.

Mourinho enkawl AS Roma hian kum hluia an match hnuhnungah Turin khawpui an tlawh a, second half tir lamah Juve tan midfielder Adrien Rabiot chuan goal awmchhun a khung - Old Lady hian hmahruaitu Inter Milan nen an inkar chu point hnih lekah an sawr zim.

Roma erawh tun season chu an che fuh rei thei lo. Mourinho chuan, "Tunah hian palina Fiorentina kan phak lohna chu point nga a ni a, table chung lama mite kan hnaihchilh theihna tur a nih phawt chuan kan theihna zawng zawng kan hlan zel ang.

"Kum 2023 kan hman dan kha thlir kir ta ila, kawng hrang hranga hma kan sawn laiin official lam duhsakna kan dawng lo deuh, lai taka inkhel thunun ni se la chuan a kum zawnin European football-ah kan hlawhtling ngeiin a rinawm, mahse kan vanduai ta zawk.

"Thil liam tawh kan ko kir thei lo a, kan thlen chin lawmawm viau mah se keini ang Roma tan chuan a la sang tawk lo, tun aia ṭha leh ropui zawk hian kan la che thei a ni," a ti. Roma hian nizan khan Coppa Italia last 16-ah Cremonese an mikhual a, result erawh kan hre hman lo.