Curry hoin GSW chak ve ta

A zawna match thum an tlawm hnuah Golden State Warriors chuan nimin zing khan chak ni hmel an hmu ve leh ta. Golden State tan hian Stephen Curry chuan point 36 a nei a, hei bakah hian assist vawi ruk nei bawkin Orlando Magic 121-115 in an hneh.

San Francisco-a inkhelah Wariors tan Jonathan Kuminga chuan point 19 a nei a, ani bakah hian point 15 neitu Klay Thompson a langsar bawk. Western Conference lama 11-na ni lai GSW tan Magic hneh hi chanchin lawmawm a ni ang.

Eastern Conference lama hmahruaitu Boston Celtics erawh an che fuh lo. Celtics hian Oklahoma City Thunder chu 127-123 in an ngam lo - Thunder an chak theih nan point 36 teh meuh neitu Shai Gilgeous-Alexander a langsar hle.

Oklahoma City Thunder tan season duhawm a ni ve tho a, an match hnuhnung pangaah chak vekin Western Conference lamah chuan an chungah hmahruaitu Minnesota Timberwolves chauh an awm.

A zawna match 11 tlawm tawh Charlotte Hornets pawhin chak ni hmel an hmu ve leh ta. Terry Rozier-a point 34 neih hmangin Sacramento Kings chu 111-104 in an hneh.

NBA Most Valuable Player ni lai Joel Embiid pawh hliam vanga ni 11 a chawlh hnuah a inkhel thei ve leh tawh a, triple-double (31 points, 15 rebounds leh 10 assists) nei leh nghalin Philadelphia 76ers chu Chicago Bulls lakah 110-97 in a chakpui.