MPL10 Mimal Lawmman Dawngtute

Zote Toyota MPL10-ah Mizoram Police midfielder H. Lalbiakthanga chu best player-a thlan a ni a, Kawnpui/Armed Veng pa hi best midfielder atan thlan a ni bawk. MPL best player-ah goal khung thei player emaw ball sem thiam bik leh pet goal thei inkawp player emaw tlarhnunga defender rinrawl emawte thlan an ni ṭhin a, tun ṭuma best player atana thlan BT-a erawh team tan a lang lo lama ṭangkai player a ni thung.

BT-a hi Santosh Trophy qualifying round-ah khan Mizoram tan match zawng zawngah a inlan vek a, a khel tluan vek bawk. MPL ṭantirh aṭangin BT-a a inlan tawh a; FC Kulikawn, Luangmual FC leh Aizawl FC tan te pawh a khel tawh. Chutihrualin BT-a hian mimal lawmman hi a la dawng ngai lo a, a dawn vawi khatnaah best midfielder leh best player chawimawina a dawng kawp.

MPL10-ah pawh BT-a hi Police rinrawl a ni a, round 14-a an tlin chian hnua bench-a an dah tih loh chu bul a ṭan vek. September 5, Thawhlehnia Project Veng nen an inkhelh ṭumin goal a khung a, man of the match-ah an thlang. Chhinga Veng laka point khat hlu bik an hmuh ṭumin man of the match-ah thlan a ni leh bawk. Final-ah player 10-in hun rei tak an khel a, Police-in Chanmari laka kim loa khel chunga hnehna an chan theih nan a pawimawh hle.

Goal khung tam ber

Aizawl FC forward Lalrinzuala'n MPL10-ah goal riat khungin top scorer a ni a; phase 1-ah match sarihah inlan vekin goal sarih khungin vawi thum man of the match-ah an thlang. Phase 2-ah I League vangin match hnihah chauh inlanin goal khat a khung belh a, Chanmari FC an hneh ṭumin man of the match-ah thlan a ni leh bawk.

Rinzuala hi man of the match-ah ṭum li thlan niin thlan ngun ber a ni a, hei hian tun season a hman ṭhatzia a sawifiah. Aizawl FC-in semifinal khel lo mah se Rinzuala hi best forward chawimawina pek a ni. I League nen khel kawp lo se AFC hi MPL nomawi chawi thei dinhmunah an ding a, hun pawimawh laia I League vanga an zinchhuah miau avangin tihtheih dang an nei lo - MPL10-a goal khung tam berin best forward chawimawina a dawng hi a mak hran lo.

Best goalkeeper = Mizoram no. 1

Santosh Trophy-a Mizoram no. 1 keeper F. Lalmuanawma chu best goalkeeper atan thlan a ni a, MPL Best Keeper chawimawina vawi thum a dawnna a ni. Final-ah hian Khawbung/Upper Republic pa Muanawma hian penalty vawi hnih a save bakah a pet goal a, a langsar hle.

Tun season-ah Police hian match 15 an khel a, Muanawma hian match 13 khelin vawi thum a cleansheet a, man of the match-ah vawi hnih thlan a ni a, goal 18 a chhuah. Muanawma hi match hnihah a inlan lo a, a khelh loh ṭumin Police-in goal ruk an chhuah a, hei hian team tana a pawimawhzia a sawifiah.

Best defender Ahmuntea

Best defender atana thlan Lalhmunmawia hi Mizoram tan pawha tlarhnung bang rinawm a ni a, best player BT-a ang thoin Santosh Trophy qualifying round-ah match zawng zawng bakah minute zawng zawngah a inlan vek.

Police-ah pawh Hualngohmun pa Ahmuntea hian hmun pawimawh a chang a, coach BS-a Colney-in a kawppui tur hi a zawng a ni ber zawk. Ahmuntea hi inhliam vangin a inlan tam tawk lo a, match 15 khelh theih aṭangin match kuaah chauh inlan mah se a khelh ṭumah a ṭangkai. Semifinal leh final-ah Ahmuntea hi awm lo se, Police-in nomawi an chawi kher lo ang, tih theih a ni.