Zote Toyota MPL10 - A bul ṭan dan fuh lo, a tawp khar ṭha

Mizoram chhunga football inelna sang ber Zote Toyota Mizoram Premier League season 10 chu August 25, Zirtawpni aṭanga khelh ṭan niin December 22, Zirtawpniah a tawp khar a ni. MPL10-in hun rei zawk mipui ko khawm thei lo mah se final-ah meuh erawh entu an ṭhahnem hle.

Kum dang pha lo

MPL-ah entu an tlahniam a, Lammual aṭanga RG Stadium-a insawn hnuah entu mipui hi nasa takin a tlahniam. RG Stadium pan harsat vang a tih theih a, amaherawhchu hei ringawt hi chu a ni lo deuh.

MPL tihlutu zinga mi MPL Kick Off chu MPL10-ah a awm lo a, RG Stadium-ah August 25, Zirtawpni chhun pangchangah inelna ṭan pawp a ni a, ṭum dang aiin 'publicity' a ṭha lo.

Ni hnihnaah Chhinga Veng leh Mizoram Police te inkhel tur an ni a, inkhel en châkawm bik ni mah se Chhingcows lam registration fel loh vangin an inkhel thei lo. Police hi 3-0 a chaktir an ni a, hei hi MPL history-a a vawi khat thlenna a ni.

MPL hi Mizoram chhunga football inelna sang ber ni chung siin inelna buatsaihtu MFA-in ground ṭha ber RG Stadium an chang meuh lo. MPL10-a match tam zawk hi 1st Bn MAP Ground, Armed Vengah khelh a ni a, India rama Mizoram football sang taka chawikangtu MPL-in hmun pawimawh a chang lo hi thilmak a tling.

Club-te inpekna a hlu

Inelna neih nan RG Stadium hman mumal theih a ni lo a, club-te phei chuan practice-na tur hmun ṭha an nei lo. Hei erawh hmasawnna kawng zawh mek vang a tih theih a; Aizawl khawchhung leh a chhehvela artificial turf phah ho zo tawh se chuan he buaina hi a thleng kher lo ang.

Hetichung hian club lamin Mizoram football hma ngaiin theihtawp an chhuah a, harsa taka sum khawn khawmin team ṭha tak an din thei a; entu tam tawk lo mah se inkhel ṭha tak an chhawp ṭhin. Club neituten fak an phu hle a ni.

A tawpah rah ṭha

Mizorama infiamna pawl hrang hrangah changtlung ber ang hiala sawi theih MFA-in tawnhriat an neih ṭhat a lang a, season tawpah erawh a hmawr ṭha takin an bawk. Chanmari FC leh Mizoram Police FC ten MPL history-a final hmuhnawm ber ang hiala chhal theih an chhawp chhuak a, Mizoram football chanchin sawi apiangin December 22, Zirtawpni zan inkhel kha hmaih a thiang tawh lo.

Mizo pain football hmuhnawm a chhawp chhuak thei tih chiang takin a lang a, tualchhung football hmangaihtu/hmuhnawmtitu ṭhahnem tak an awm tih a lang bawk. Mizoram Police-in a vawi khat nan MPL nomawi an chawi a, an kalkawng erawh a awlsam lo. Lalbiaksanga Colney leh a hote champion dan kha chu, thawnthu ziaktuin thiam taka a ziah ang mai a ni a, football khawvela thil thleng zen zen lo a ni.

2022 FIFA World Cup final-a Argentina-in France an hneh dan nena khaikhin duh an awm a nih pawhin a mak hran lo a, minute 120 chhungin 3-3 a ni a, penalty shootout hmangin chak zawk zawn a ni. Lionel Messi-a'n a vawi khat nan World Cup nomawi a chawi ang chiahin Police player-ten a vawi khat nan MPL nomawi an chawi.

Final-ah Malsawmfela, Lalbiakhlua leh Lalfakzuala ten an theihna tak tak an pho chhuak a, Police nge nge tih theih turin BS-a leh a naute an khel ṭha. Season ṭantirhah Police-in civil player F. Lallawmkima an la lut a, Khawbung tlangval Lawma hi senior player-te kiangah a che ṭha hle.

Mizoram football inelna ngaihhlut Zote Toyota MPL10 chu a bul ṭan dan fuh tawk lo mah se a tawp khar dan erawh duhthusama ṭha a ni.

Final zana fans rin phak baka tam kan nei kha lawmawm ka ti. Kan pute leh Police-a kan thawhpuiten min ṭawiawm ṭha hle.

Ka lawmna ber chu Super Cup, I Day Football, All India Police Meet (Football) leh MPL-ah kan champion vek thei a, lungthu kan kima ka lawm takzet. Kan hlawhtlinna hi players leh Coaching staff-te inlungrual rah a ni.

Kum thar 2024 hmachhawp hmasa ber chu All India Police Meet-a champion nomawi humhim a ni dawn a; February 20-28 inkar hian Madhya Pradesh-ah inelna hi neih tur niin January aṭangin kan inbuatsaih ṭan ang.

- Lalbiaksanga Colney, Mizoram Police coach