Harry Kane, Son leh Bergwijn te an fit tawh

Tottenham coach Jose Mourinho chuan a player pawimawh Harry Kane, Son Heung-min leh Steven Bergwijn te chu an hliam damin an fit tawh a, inkhel tur erawh chuan an inpeih famkim tawh tihna a la ni kher lo tih a sawi bawk.

Coronavirus vangin Premier League a khelh theih rih lo, an chawlh lailawk hma khan Spurs hi an talbuai; match ruk chhung chak nei loin an kal hman - heng inkhelah hian Kane leh Son te an inlan ve lo.

Hri leng vangin an chawl a, striker Kane hliam a dam hman. South Korea international forward Son pawh a hliam a dam hnuah sipai training a zo hman, an ram aṭangin London-ah kir leh tawhin training pawh ṭha takin a zawm leh thei tawh.

Mourinho chuan, "Inkhel turin an inpeih em tih chu ka sawi tlang vek thei lo. Hei erawh ka sawi thei, an hliam a dam tawh bakah an taksa a fit ṭha tawh. Taksa fit tak neih hnuah hian inkhel tura inpeih turin hmabak a la awm thei.

"Harry hi thla nga chhung vel a inkhel thei lo a, player dangte erawh an inkhelh loh chhung a la rei lo deuh. Harry Kane, Son, Bergwijn leh Moussa Sissoko ten training an zawm ṭha vek a, kan tan chuan chanchin lawmawm a ni," a ti.

Portuguese manager hian training chu kalpui reng mah se hripui an hlauh ve tho thu leh, hrileng laka an him theih nan an theih ang chin chinah sorkar thu chhuak an zawm ve thu a sawi bawk.