Tawia, Victor leh Stephan ten AFC 'A' Licence nei thar

Mizo coach pathum Lalruatliana Sailo (Vaivakawn), Victor Lalbiakmawia (Mission Vengthlang) leh Stephan Tawnthansanga (Muthi) te chuan Asian Football Confederation 'A' Licence Coach an pass thar.

Lalruatliana Sailo hi Tawia tia hriat lar a ni a, MSSC-ah coach hna a thawk mek. MPL club FC Kulikawn leh FC RS Annexe-ah coach cum player hna a chelh kawp tawh a, Ramhlun North FC leh Chanmari FC te enkawl tawh bawk.

Mizoramin National Games an champion ṭum khan Victor hi K. Malsawmkima hnuaiah assistant coach a ni a, MPL-ah FC Bethlehem leh Aizawl FC te enkawl tawhin tunah hian Aizawl FC academy-ah head coach hna a thawk mek.

Stephan hi Services player hlui a ni a; Services-ah goalkeeping leh assistant coach hna chelh tawhin kum 2019-a Santosh Trophy-ah an champion a, Air Force-ah assistant coach hna a chelh tawh bawk.

AFC 'A' Diploma Licence Coaching Course hi Module thumah ṭhen a ni a; Module-1 hi February 20-28, 2023 chhung khan CVM Anand Gujarat-ah neih a ni a, Module-2 hi September 5-12, 2023 chhung khan Bhavnagar, Gujarat-ah neih leh niin November 25-30, 2023 khan Srinagar-ah Module-3 leh a hmawr bawkna hi neih leh a ni. Result hi AIFF-in January 4, Ningani khan an ti chhuak a, Mizo coach-te hi an pass vek.

Tuna India Football kalphungah AFC 'A' Licence neiten I League-ah head coach hna an thawk thei a; Indian Super League leh National Team-ah te assistant coach atan hman theih an ni bawk. Mizo zingah A Licence coach panga an awm ta a; Tawia, Victor leh Stephan te hma hian Danny Lalduhawma, Aizawl Venglai leh K. Lalrindika, Mission Vengthlang ten AFC A Licence hi an nei tawh a ni.