Mizote hian kan thil neih kan hlut a, kan duat thiam a ngai - Sports Minister
Nimin zing khan Mizoram sports minister Lalnghinglova Hmar hoin Mizoram Badminton Association hruaitute leh Smart City hotuten Zuangtui Badminton Hall an en ho a, hnathawh chinah an lungawi. Sports minister chuan Mizoten kan thil neih kan hlut a, kan duat thiam a ngaih thu a sawi.
Tetea Hmar chuan, "Zuangtuia Infrastructure ṭha neih hi a lawmawm a, sorkar hmasa chungah lawmthu ka sawi. Hman ṭangkai leh humhalh, national level competition thleng thei tur a nih angin dimdawi taka enkawl a ṭul. Mizote hian kan thil neih kan hlut a, kan duat thiam a ngai. Kan nei ṭha tawlh tawlh, a enkawl zui a pawimawh," tiin sorkar hmasa a fak.
Sports Minister chuan sawi chhunzawmin, "Badminton chu India level-a kan lanin world level kan kai thuak tihna a ni ṭan ta, he game-ah hian eizawnna a awm, kan ṭan a ngai. Tih takzeta beih a ngai a, tute emaw insawizawina mai mai ni lo, ṭhangthar tana beih a ngai. MBA-in academy leh naupang zirna an uar hian min tilawm hle," tiin Vanglaini a hrilh.
Zuangtui Badminton Hall hi court paruk awmna tur a ni a; mipa leh hmeichhia riah theihna tur, parking ṭha tak, gym, yoga leh instructor room te awm tura duan niin Mizorama Badminton Hall changtlung ber leh lian ber tur a ni.
MBA honorary secretary Lalrinzuala chuan, "Badminton-ah hma kan sawn ve zel a, chum atana rahbi pawimawh em em pakhat, stadium lian ṭha kan nei thei tur hi kan lawm takzet. Khawvel a lang pha thei player-te chher chhuahna hmunpuiah hman ngei kan tum. Player naupang zawkten an chhawr ṭangkai ngei theih turin ruahman kan tum a ni. Hemi kan mitthla ang min mitthla pui leh min finchhuah thei Sports Minister kan nei hi kan lawmin kan phur takzet a ni," tiin Vanglaini a hrilh.
Sports Minister leh MBA ten an en ho hnu hian media box bakah camera dahna tur siam ṭha an ti a, mithiam zawk nena en ho leh tur a ni. MBA Office pawh ruahman a ni dawn a, flooring leh lighting ṭha thei ang ber hman tum a ni bawk.
MBA hian Pullela Gopichand Intensive Training Centre, Ramhlun Indoor Stadium-ah an kalpui mek a; High Altitude Training Centre, Sihphir a sak turin hma an la mek. MBA honorary secretary Lalrinzuala chuan Mizoram badminton hmasawnna kawnga an thawhpui Tata Trusts/Neida ṭangkai thu Vanglaini a hrilh tel bawk.