Sawisel kaiin Barcelona an chak hram

Kum thar an match hmasa berah Barcelona-in chak turin vanneihna an mamawh a, an mikhualna ramah Las Palmas chu penalty sawisel hlawh tak hmangin an hneh hram - Catalan club hi 2-1 in an chak a, table-ah pathumna an ni.

Rin loh takin Las Palmas lamin goal an khung hmasa zawk a, Munir El Haddadi chuan a club hlui Barcelona lakah goal hmahruai a khung. Mahse, Catalan club tan Ferran Torres chuan si phurh sutin, hun pek belhah Ilkay Gundogan chuan chakna goal a khung zui.

Manchester City captain hlui hian penalty aṭangin chakna goal hi a khung a, referee thutluknaah Las Palmas an lawm lo hle. Mahse, referee-in a ngaihdan a sawh sawn lo a, 2-1 in Barca an chak.

Barca an buai

Inkhel ṭantir lamah Las Palmas-in inkhel an thunun zawk a, Barcelona an che hleithei lo. La Masia chhuak Sandro Ramírez chu a club hlui Barca tan a hnawksak takzet a, a vanneih zan ni se goal khung thei dinhmunah a ding hial.

Ramirez-a'n goal khung lo mah se, Barca hremtu chu an player hlui tho El Haddadi a ni a, Morocco international hian minute 12-na lekah hmahruaina goal a khung - Barca an hawihai.

Barca-in si phurh an sut thei lawk lo a, si phur chungin chawlhlawk an hmang. Mahse, second half ṭan aṭanga minute 10-naah, January-a chhuak tur anga sawi Torres chuan Barca tan khelh a phu tih pholangin, si phurh sutna goal a khung.

Vanneihna

Barca-in hnehna chang zo lo se, point kua ngawtin hmahruaitu Real Madrid an thlau dawn. Point khata lungawi an zir a ṭul mai dawnin a lang hman a, mahse, hun pek belh minute thumnaah Gundogan chuan vannei takin penalty a hlawh chhuak.

Joao Felix goal shot, Las Palmas keeper Álvaro Valles dan per chu goal ruaka tauh luh tumin Gundogan a zuang a, hei hi Las Palmas substitute Daley Sinkgraven chuan a lo nam thlu niin referee chuan a hmu.

Penalty spot a kawk zui a, Gundogan chuan harsatna nei loin goal-ah a chantir - mahse, a penalty hlawhchhuah dan hi uluk taka ennawn chuan, German midfielder hi Sinkgraven hian a nam niin a lang lo a, a ball tauh tur zuang, tauh fuh loin a tla ve mai niin a lang.

A na a ni

Las Palmas captain Kirian Rodriguez chuan, "Kha inkhela inbiakna vel audio kha an tihchhuah vat ka beisei a, kha thil thleng kha chu ka beisei loh tawp a ni," a ti a, referee thutluknaa a lungawi loh thu a sawi.

Barca boss Xavi chuan, "Hun tawp dawn tawhah penalty hmangin kan chak. Kirian dinhmun ka hriatthiampui a, chutihrual chuan Sinkgraven khan a nam ngei a, penalty a ni ngei bawk," a ti a, sawisel hlawh penalty chu penalty ngei niah a ngai.

Las Palmas hliama chi phul belh turin penalty chawitu Sinkgraven chu hnawhchhuah a ni bawk a, Barca laka point hlawh chhuak tur emaw inti hman Las Palmas-in kut ruakin khelmual an chhuahsan.