Gauff tan hna a awlsam

US Open champion Coco Gauff chuan Australian Open atan inbuatsaihna a nei ṭha chho hle. Nimin khan Varvara Gracheva hnehin Auckland Classic khelh laiah semifinal a inhlangkai.

Kum 19 mi Gauff hian hnehna chang turin minute 52 bak a mamawh lo, set hnih an khelhah hian game khat ve ve chiah a hloh; nuamsa tak 6-1, 6-1 in a chak, a match lehpekah chuan amah ang bawka American player Emma Navarro nen an inkhel ang.

Season hmasa khan Gauff hian US Open nomawi a chawi a, hard court a hmang thiam tih a nemnghet. January 14 aṭanga khelh ṭan tur Asutralian Open-ah pawh rinkai a ni dawn, chutihrualin Melbourne Park-ah hian tun hma chuan fourth round a la pel ngai lo.

Grand Slam inbuatsaihna dang Brisbane International lamah world number 4 Elena Rybakina leh Australian Open champion hlui Victoria Azarenka te pawhin semifinal an inhlangkai ve bawk.

Wimbledon 2022 champion Rybakina hian Anastasia Potapova lakah set khatna chu 6-1 in a la a, set hnihna khelh leh hmain seeded 11-na Potapova hi hliam vangin a inkhel thei ta lo. Semifinal-ah chuan Rybakina-i'n Mirra Andreeva hnehtu Linda Noskova a tum leh ang.

Australian Open 2012 leh 2013 a zawna champion Azarenka pawhin Jelena Ostapenko chu 6-3, 3-6, 7-5 in a hneh, chak tur hian darkar hnih leh a chanve chhung ngawt hun a hmang a, inkhel inhnehtawk takah a vannei zawk a ni.