Mizo player-ten Masi an hmang ṭha!

India rama football league inelna sang ber Indian Super League chu Krismas chawlh pawh nei loin khelh a ni a, ruai kan ṭheh mup mup lai khan Mizo player-te chuan khelmual lamah hun an hmang. December 29 khan match hnuhnung ber khelh niin, kum thar chawlh hmang zuiin, international break-in a zui a, tunah an chawl mek thung.

Krismas chawlh lai khan ISL-ah match riat khelh a ni a, hetih chhung hian Mizo player-ten hming an chher hle. December 26, ruai ṭheh niah khan Odisha FC chuan 1-0 in Punjab FC an hneh a, inkhela goal awmchhun hi Roy Krishna khung niin, Isak Vanlalruatfela siamsak a ni.

Thingsulthliah/Bawngkawn tlangval hi player of the match atan thlan zui niin, tun season-ah he award hi a dawn vawi hnihna a ni a, tun season ISL khelh mekah Isak-a aia player of the match-a thlan ngun zawk chu Mumbai City forward Jorge Pereyra Díaz (3) leh Kerala Blasters chhuanvawr Adrián Luna (3) te chiah an la ni - season a hmang ṭha hle.

Tun season-ah Odisha forward Jerry Mawihmingthanga, AIFF player of the year ni lai leh Mumbai forward Lallianzuala Chhangte leh Jamshedpur FC defender PC Laldinpuia te chu Mizo player zinga player of the match award dawng tawh an ni.

Season hman mekah ISL match 68 khelh a ni tawh a, heng zinga match ngaah hian Mizo player-te an khel ṭha ber tihna a ni. Isak-a hian Krismas vuakvet hi nuam a ti hrim hrim em ni chu aw, tih mai tur a ni a, December 29 khan goal a khung.

Odisha chuan an mikhual Jamshedpur chu 4-1 in an sawp a, he inkhelah hian Isak chuan goal hmahruai a khung a, Fiji captain Roy Krishna siamsak a ni - Isak-a hian first half hun pek belhah Roy Krishna hi a duhsak let ve leh a, a goal khung tur a siamsak.

Season hmasa ISL hero of the league ni thei Lallianzuala'n beisei angin tun season a hmang lo a, mahse, December 28-ah khan a thiam a la theihnghilh lo tih a pholang - phur tak chungin Asian Cup khel turin a zin theih phah ang.

December 28-ah hian Mumbai hian 3-0 in Chennaiyin an sawp a, Lianzuala hian first half-ah penalty a hlah phawt. Mahse, rilru paukhauh Mizo forward hian minute 52-naah a tihsual siam ṭhain, mawi zetin hmahruaina goal a khung - player thiam bik ke aṭanga chhuak a ni.

Hemi hnuah hian Vikram Pratap Singh (penalty) leh Gukirat Singh ten Mumbai tan goal an khung ve leh a, Chandigarh rawlthar Gurkirat-a goal khung hi Mizo midfielder Lalengmawia Ralte (Apuia) siamsak niin, Mumbai chak nan Mizo player pahnihin an thawhhlawk hle.

ISL khelh mekah hian Mizoram player 27 an awm mek a, Odisha chu Mizoram player tamna ber niin, anni hian Mizo player pakua ngawt an kawl mek a ni.