Nuamsa takin Juve an chak

Juventus chuan a bul ṭan fuh lo zeuh mah se a hnu lamah an insiamṭha a, an mikhual Salernitana chu 6-1 a hnehin Italian Cup quarterfinal an lut - semifinal thleng tur chuan Frosinone an paltlang leh a ngai dawn a ni.

Ningani zan Turin khawpuia inkhelah Juventus an chesual hmasa zeuh. Second 59 chauh an inkhel hman tihin defender Federico Gatti-a'n ball a pass sual a, a tihsual vang hian Chukwubuikem Ikwuemesi-a'n mikhual tan goal hmahruai a khung.

Massimiliano Allegri leh a naute an hawihai a, an buai chhunzawm lo thung. Minute 12-ah Fabio Miretti hmangin si phurh an sut a, a hnu lamah chuan a khat mawi tawkin goal an khung chhunzawm tiin a sawi theih.

Miretti bakah Kenan Yildiz leh Timothy Weah ten a vawi khat nan Allianz Stadium-ah goal an khung a, anni bakah hian Andrea Cambiaso leh Daniele Rugani te bakah Salernitana defender Dylan Bronn-a'n anmahni lamah a ti lut ve bawk.

Frosinone hian thla hmasa mai khan Serie A champion Napoli chu 4-0 in an lo hneh tawh a, thil mak beisei nawn mah se an thlentir thei ta lo. Juve hmachhawn leh tur Salernitana hi Old Lady striker hlui Filippo Inzaghi enkawl an ni a, an thawnthu a ngaihnawm khawp ang.

Juve manager Allegri chuan, "Hnehna kan chan hi kan taksa bakah rilru thlengin a ṭha zawngin nghawng a nei ngei ang. A tirah khan min timangang hman a, a tawp kan khar dan erawh duhthusama ṭha a ni ta zawk.

"Player zawng zawng an khel ṭha, goal khung tute hming a langsar ṭhin. Anni tluk zetin Federico Chiesa hna thawh kha sawi hmaih theih a ni lo a, a ṭhiante goal khung tur vawi hnih a siamsak kha a ṭha dun hle, tunah chuan ngai a awh leh takzet tawh," a ti.

Juventus hma hian AC Milan, Atalanta, Lazio, AS Roma, Fiorentina, Bologna leh Frosinone te chuan last 16 an lo paltlang tawh bawk.