AIFF-in season ṭan theih beisei

Indian football-a thuneitu sang ber All India Football Federation chuan a tlai berah October-ah chuan 2020-21 atan season an ṭan theih an beisei thu an sawi a, a bik takin Indian Super League chuan talbuai loin season an ṭan thei dawn tihna a ni. 

AIFF general secretary Kushal Das chuan, "Ministry of Sports lamin ruahmanna fel tak hnuaia training neih min phalsak tawh a, hetihrual hian team sports leh contact sports hi chu a pangngai ang taka thil kalpui tur chuan hun a la duh deuh ang. 

"Women's Under 17 World Cup hi February 2021-ah kan thleng dawn a, a rang thei ang bera training nei turin ruahmanna siam mek a ni. AFC (Asian Football Confederation) U16 Championship hi September-a khelh tur a awm bawk. A hun hi AFC lamin la sawn chiah lo mah se an sawn ngei erawh ka beisei," a ti. 

AIFF hian March 15 khan Ministry of Youth Affairs and Sports (MYAS) thupek angin a hnuaia inelna zawng zawng chu a titawp vek a, I League pawh khel zo hman lo mah se Mohun Bagan an champion hman thung. 

Indian FA hian season thar bul ṭan nan AIFF Futsal Club Championship an huaihawt tur thu an lo sawi tawh a, Mizoram aṭangin Aizawl FC chu tel tur chianga ngaih niin MFA Futsal League champion an tel bawk ang. 

Hetihlai hian Indian club-te chu Covid-19 vangin player hlawh pek dan chungchangah an talbuai mek a, mahse AIFF chuan club-te chu player-te nen inbiakremna neia an duh anga contract kalpui turin thurawn a pe - player thar lakluhte chu season thar ṭan hun chiah aṭanga an hlawh pe turin AIFF chuan a ti. 

Chumi awmzia chu contract ziah ruala pawisa inpek ṭhin kha awm loin season ṭan ni aṭangin hlawh an la ṭan dawn tihna a ni. Mahse, player leh club hi he thutluknaah hian an inrem thlap a ngai thung ang.