Zanin aṭangin Copa del Rey

Tunkar tawpah La Liga a awm dawn lo a, Copa del Rey a awm thung ang. Kum 1903 aṭanga khelh ṭan inelna hi Spain rama inelna upa ber a ni.

Team 32 an la dam a, team langsar pathum Real Madrid, Barcelona leh Atletico Madrid te an la dam vek. Zanin dar 8:30-ah Atletico-in Lugo an hmachhawn dawn a, Lugo hi Primera Federación-a mi niin Spanish third division club an ni.

Real Madrid-in zanin dar 2:00 hian Arandina an tlawh dawn a, Spanish fourth division club an nih avangin Los Blancos tan harsa tur awmin a lang lo.

Barcelona pawhin khualmualah an khel dawn a, January 7, Pathianni zan dar 1:30-ah fourth division club Barbastro an hmachhawn dawn.

Copa del Rey-ah hian Real Madrid chu champion lai an ni a, nikum khan final-ah Osasuna 2-1 in an hneh. Champion ngun ber erawh Barcelona niin vawi 31 an champion tawh a, Athletic Bilbao-in vawi 23 nomawi chawi tawhin Los Blancos-in vawi 20 nomawi an chawi tawh bawk.