India-in ni khat leh a chanve lekah hnehna chang

India-in South Africa laka Test match-a hnehna chang turin ball 642 chauh an mamawh a, ni khat leh a chanve lekah hnehna an chang. Men in Blue hian cricket chanchinah mellung thar an phun a, Cape Town-a an hnehna chan dan hi hriat reng a ni tawh ang.

Test match vawi hnihna hi January 3-4, 2023 khan khelh a ni a, India hian hnehna chang mah se Test match vawi khatnaah an chak loh avangin South Africa nen hian series-ah 1-1 in an inhnehtawk.

Ball 140 lek

Ṭhumvawrah South Africa an chak a, bat hmasak an thlang. India-in Mohammed Siraj an neih avangin Proteas thutlukna a sual a tih theih. Siraj hian opener pahnih Aiden Markram (2) leh captain Dean Elgar (4) te chu run nga an siam tlin hmain pavilion lamah a kirtir.

Jasprit Bumrah-a'n Tristan Stubbs a vawm hlum hnuah Siraj-a'n Tony de Zorzi (2), David Bedingham (12), Kyle Verreynne (15) leh Marco Jansen (0) te a vawm hlum vek. First innings-ah Siraj hian wicket ruk a la a, 15 runs chauh a pek bawk avangin a vawm ṭha thlawt.

Ball 140 lekah South africa an thi fai vek a, 55 runs chauh an siam. Mahse, India batter-te pawhin beisei an pha bik lo. Batter ṭha pathum Rohit Sharma (39), Shubman Gill (36) leh Virat Kohli (46) ten run siam chhe lo mah se run siam miah lo player pasarih an awm. Men in Blue hian 153 runs chauh an siam.

Bumrah hun

First innings-ah Siraj a che ṭha a, second innings-ah India chhuanvawr Bumrah a rawn che ṭha ve thung. Opener Markram-a'n century (106) siam mah se thlawptu a nei ṭha lo. Markram-a bul ṭanpui captain Elgar-a'n 12 runs a siam a, second innings-a run siam tam ber dawttu a ni.

Bumrah-a'n wicket ruk rawn lain 61 runs a pe a, Siraj pawhin wicket khat chauh la mah se a wicket lak hi Markram a nih avangin a hlu hle. Mukesh Kumar-a'n wicket hnih a rawn lak bakah Prasidh Krishna-a'n wicket khat rawn la ve bawkin South Africa hi 176 runs an siam tihin an thi fai vek.

Proteas target chhawp hi 79 runs chauh a ni a, India-in over 12 lekah 80 runs siamin target an umpha. India hian innings hnihah ball 642 chauh an vawm a, hnehna chanpui nana ball hmang tlem ber record thar an siam.

India hian record ropui tak siam mah se Krismas ruai ṭheh niah Proteas hian Centurion-ah mikhual team hi an hneh miau a, Men in Blue hian South Africa-ah Test series an la lo chhunzawm zel thung.