2024 Indian Super Cup: ISL club an tel vek; I League club panga an tel
2024 Indian Super Cup chu January 8, Thawhṭanni aṭangin khelh ṭan a ni dawn. Indian Super League club 12 an tel vek a, I League club 13 aṭangin panga chauh an tel. Inelna hi Kalinga Stadium, Bhubaneswar-ah khelh a ni dawn a, champion hian AFC Champions League 2 an khel ang.
Inelna kalphung
Inelna hi qualiyfing round leh group stage-ah ṭhen hran a ni a, group stage-ah hian ISL club 12 bakah I League club pathum Gokulam Kerala, Shillong Lajong leh Sreenidi Deccan te an tel nghal. Hmunruak pakhat awm hi Inter Kashi leh Rajasthan United ten an inchuh dawn a, qualifying round bik hi January 8, Thawhṭanni dar 2:00-a khelh tur a ni.
January 9, Thawhlehni aṭangin group stage khelh ṭan a ni ang. Group stage-ah hian team 16 chu group paliah ṭhendarh an ni a, a sang ber ṭheuhin semifinal an lut dawn. Best Player, golden boot, golden glove leh fair play chawimawina a awm ang.
Group A-ah Mohun Bagan SG, East Bengal, Hyderabad leh Sreenidi Deccan te an awm a, group B-ah Kerala Blasters, NorthEast United, Jamshedpur leh Shillong Lajong te awmin group C-ah Mumbai City, Chennaiyin, Punjab FC leh Gokulam Kerala te an awm bawk. Group D-ah FC Goa, Odisha FC leh FC Bengaluru bakah Inter Kashi leh Rajasthan United inkhela chak zawk an awm ang.
Foreigner paruk
Indian Super Cup hi AFC Champions League 2 atana inpuahchahna a ni ber a, AFC hnuaia inelna milin foreigner paruk chhawr theih a ni. I League club tan chuan champion hi 'vana rah ang' mai a ni a, AIFF-in tel ngei ngei tura thupek a neih loh avangin I League club panga chauhin inelna an hmachhawn dawn.
Super Cup hi Bhubaneswar, Odisha-a khelh tur a ni a, club-in team zinna bakah player thlenna senso zawng zawng a tum vek avangin champion beisei lo I League club tan chuan chatna hlir tiin a sawi theih. Season liam ta khan Super Cup hi tel ngei ngei a ngaih avangin Aizawl FC pawh an tel a, I League club pakua an tel avangin qualifying pawh chhawng hniha neih a ni.
Mizo club hian Trau hnehin group stage khel turin an tling a, ISL club lakah pawh an result a zahpuiawm loh. Hyderabad lakah 2-1 chauhin an tlawm a, Odisha FC lakah 3-0 in tlawm mah se match tawp berah East Bengal 2-2 in an chelh.
Aizawl FC sporting director Hmingthansanga chuan, "Super Cup pual bik hian club-in AIFF aṭangin sum lama hamṭhatna dawn tur a nei lo a, club leh player tan inphochhuahna ṭha tak ni mah se tel loh ṭha kan ti ta zawk. Season ṭha taka kan hman theih nan player leh coaching staff ten Krismas leh kum thar chawlh nuam taka an hman kan duh a, Super Cup khelh lai hian I League atana inpuahchahna ṭha takin kan kalpui thei bawk ang," tiin Vanglaini a hrilh. Mizo club hi I League khelh mekah point 19 hmuin palinaah an awm mek a, an chunga awm Real Kashmir leh Sreenidi Deccan aiin point khat chauhin an hmu tlem a ni.