Luton Town-ah Townsend a cham dawn

Premier League club Luton Town winger Andros Townsend chuan contract thar a ziak a, a contract rei zawng hi tarlan ni chiah lo mah se, "Hun rei zawk atan," tiin Luton chuan an puang.

Kum 32 mi Townsend hian Premier League-ah Tottenham Hotspur, Queens Park Rangers, Newcastle United, Crystal Palace leh Everton tan te a lo khel tawh a, mahse, season hmasa tawp kha hliam vangin a khel lo.

Hetihlaia a khelhna Everton chuan an chhuah zalen zui a, October khan Luton hi January thleng khel turin a zawm. Premier League kai thar club tan match 11 khela goal khat khungin, assist vawi hnih a nei a, contract thar a hlawh chhuak.

Townsend chuan, "Thla thum liam ta maiah kha chuan ka career hi a zo tawh angah ka ngai a, ka hlim takzet a ni," a ti a, "Trial min neihtir tura club hrang hrang dawr kual hnua rei zawk atana contract ziah theih chu mumang thleng dik ang mai a ni," a ti bawk.

England tan vawi 13 inlana goal thum khungtu Townsend chuan sawi zawmin, "Luton hi club special tak a ni a, thil danglam tak kan tih ho theih ka beisei. Match khelh tur tam tak a la awm - mi rin loh tak titurin thla ruk leh match 19 kan la nei a ni," a ti.

Premier League khelh mekah Luton hian match 19 khel tawhin, vawi li chiah an la chak a, vawi thum draw neiin, vawi 12 an tlawm - table-ah 18-na ni mekin, relegate thei chinah an awm a, mahse, Townsend-a'n an him theih a beisei.

Luton manager Rob Edwards chuan, "Professional nih phung leh inngaihtlawmna nun a pho chhuak ṭha em em a, a player puite tan entawn tur a hnutchhiah a ni," tiin a player chu a fak ve bawk.

Premier League-a an match hnuhnung bera 3-2 a Chelsea ngam lotu Luton hi Pathianni zan dar 7:30-ah FA Cup third round khel turin an inlan dawn a, Championship club Bolton Wanderers an mikhual ang.