Jokic hoin Nuggets an chak

NBA inkhel hmuhnawm bikah Nikola Jokic chuan player hlu a nihna a lantir a, a team Denver Nuggets chu dinhmun duhawm lo taka an din hnuah Golden State Warriors lakah 130-127 in a chakpui.

Hun tawp dawn lam minute sarih chauh a awm tawh tihin Nuggets hi point 18 ngawtin an la hniam zawk. Mahse, a hnu lamah erawh Nuggets hian point 25 an neih belh laiin GSW lamin point li bak an neih belh thei lo thung.

Second 26 chauh awm tawhah Jokic hian point neiin team pahnihte 127-127 in an inhnehtawk chiah. Hamrik hnuhnung ber a rik hma chiahin Jokic hian 39ft zeta hla aṭangin 3-points a vawm lut a, a tir lama che ṭha Warriors tan thawh lehna hun a awm tawh lo.

Hnehna an chan theih nan Jokic hian a thawh hlawk takzet, point 34 a nei a ni satliah lo - assist ṭum 10 neiin rebound vawi kua a la bawk; triple double a nih lohna chu rebound pakhat lek a ni, hun pawimawhah a hlu hle.

Western Conference table-ah hnehna changtu Denver hi pahnihna an ni, tun season kal laiah hian khualmualah match 13 an khelh zinga 11 zetah hnehna an chang, tunah hian a zawnin vawi ruk an chak mek - Warriors erawh 11-naah an awm thung.

Nimin zing inkhel dangah Giannis Antetokounmpo-a point 44 leh rebound vawi 14 lak hmangin Milwaukee Bucks chuan San Antonio Spurs chu 125-121 in an hneh.

Eastern Conference-ah Milwaukee hi pahnihna an ni mek a, season duhawm an hmang. San Antonio erawh a zawnin vawi li an tlawm ta, match 35 an khelh tawhah vawi nga chiah chak ni hmel an la hmu - Western Conference lamah a mawngphah luahtu an ni.