Neymar a hliam nâ

Paris St-Germain forward Neymar chu Lyon nen an inkhelh ṭumin zawn chhuah a ngai a, a kerek na vang hian eng chena rei nge a chawlh dawn tih hriat theih la ni lo mah se a chawlh rih deuh chu a ngaih hmel.

Lyon lamin Tino Kadewere goal khat hmangin PSG 1-0 in an hneh. Pathianni zan inkhelah hian hun tawp dawnah Thiago Mendes chuan Neymar hi a ti tlu a, Lyon midfielder hi hnawhchhuah niin Brazlian forward pawh zawn chhuah a ngai hial a ni.

PSG boss Thomas Tuchel chuan, "Khawl hmangin a hliam endik a ni dawn, chumi hnuah a chanchin kimchang a hriat chauh ang," tiin Neymar chungchang a sawi.

Kum 28 mi Neymar hian 2017 August thla khan Barcelona aṭangin PSG hi pound maktaduai 200 zetin a zawm a, a team hi Ligue 1 nomawi vawi thum chawipui tawhin season hmasa khan Champions League final an lut bawk.

Ligue 1 season kal laiah PSG-in beisei an phak lo, match 14 an khelh aṭangin point 38 hmuin pathumna an ni mek - an chungah hian anmahni aia point khata sang Lyon leh Lille an awm.