FA Cup-ah Chelsea-in Preston sawpin fourth round an lut

Chelsea-in FA Cup third round-ah Championship club Preston North End an mikhual a, second half-ah goal li khungin 4-0 in hnehna an chang. Pathianni zan inkhelah hian Armando Broja, Thiago Silva, Raheem Sterling leh Enzo Fernandez ten goal an khung.

Champion beiseina

Mauricio Pochettino hoten FA Cup an la thutak a, team ṭha bera ngaih thawhchhuahpui lo mah se an muala an khel chungin team ṭha tak an luhtir. Argentine manager Poch-a'n Premier League-ah nomawi beisei a ngam tawh loh avangin FA Cup leh League Cup-ah champion ngei a tum dawn.

London club hian January 9, Thawhlehni zan dar 1:30 hian Riverside Stadium-ah Middlesbrough nen League Cup semifinal first leg an khel dawn. Poch-a hnuaia nomawi chawi beiseina an nei lian hle.

Goal li chu

Chelsea-in team ṭha pangngai tak an luhtir chungin first half-ah goal an khung lo. Second half-ah erawh Poch-a nauten an theihna an lantir a, Malo Gusto cross ṭha chu Broja-a'n minute 58-naah ṭha zetin a tauh lut.

Blues hian tlarhnung tikhawng turin Thiago Silva an luhtir a, kum 39 mi Brazilian defender hian goal venhim chauh duh tawk loin goal a khung ta zawk. Minute 66-naah Cole Palmer-a corner pet chu Thiago Silva hian a tauh lut a, kum lamah upa tawh mah se ven loha dah a rem lo tih a rawn nemnghet. Minute thum hnuah Sterling-a'n freekick aṭangin mawi zetin a khung leh bawk.

Sterling hi Preston tlarhnung tan a hnawk zui a, minute 85-naah English winger hian ṭha zetin box chhungah a la lut a, a ball pek ṭha tak chu Enzo-a'n goal ruakah a khung.

Engtin zel?

Chelsea boss Mauricio Pochettino-a'n minute 76-naah Cole Palmer a la chhuak a, inkhelh banah Poch leh Palmer te hi mipui hmuhah an inhnial. Chutihrualin Argentine manager Poch hian Palmer hi a fak a, Chelsea tan hna ṭha tak a thawh thu a sawi thung.

Poch hian freekick aṭanga goal khungtu Raheem Sterling chu David Beckham nen a khaikhin hial a, English winger hian tun season-ah tho mawi zetin Newcastle United lakah freekick a khung tawh bawk. Blues tana thu lawmawm chu, Broja rawn che ṭha hi a ni. Season ṭantirh lamah London club hi che chhe mah se a tawp an khar ṭhat chuan Poch-a hote hi nomawi pahnih chawi thei dinhmunah an la ding.

Derby-ah Newcastle-in Sunderland an hneh 

Wear-Tyne derby-ah Newcastle United-in an hmelma Sunderland 3-0 in an hneh a, Eddie Howe-a hoten FA Cup fourth round an lut. Stadium of Light-ah mualneitu defender Dan Ballard-a'n an lamah a tilut a, second half-ah Newcastle tan Alexander Isak-a'n goal hnih a khung belh.

Newcastle tan Championship club hneh hi result naran tak angin a ngaih theih a, mahse kum 2011 hnua Wear-Tyne derby-a hnehna an chan lehna hmasa ber a nih avangin a hlu hle.

Magpies hian Bruno Guimaraes hmangin mual lai an thunun a, mual sirah Anthony Gordon a hmuhnawm. Mikhual team hian Ballard-a chetsual vangin goal hmahruai khung mah se minute 90 chhunga an inkhel thlirin chak phu zawk an ni.

Villa an chak hram

Season hmang ṭha Aston Villa-in Middlesbrough lakah goal an khung lawk thei lo a, amaherawhchu minute 87-naah Matty Cash-a'n box pawn aṭangin goal kilah pet lutin goal awmchhun a khung. Unai Emery hote hian 1-0 in hnehna an chang a, FA Cup third round an lut.

Premier League-a pahnihna dinhmun luahtu Villa hian Championship team lakah goal khat chauh khung mah se team ṭha an ni tih an lantir a, first half leh second half-ah chance an ngah hle. Chutihrualin Michael Carrick-a enkawl Boro hi dah hniam an thiang lo, League Cup semifinal lut thei an ni.