Olympic qualifier khel tur Remsiami

Infiamna khawmpui lian Paris Olympic awm kum a ni a, infiammite tan France khawpui pan a châkawm takzet. Hockey India pawhin Olympic qualifier khel tur player a thlang fel a, an zingah hian Lalremsiami Hmar pawh a tel.

India rama hockey thuneitu sang ber Hockey India hian Hockey Mizoram hnenah lehkha thawnin, Mizo nula Remsiami chu Ranchi, Jharkhand-a khelh tur FIH Women's Olympic Qualifier-a tel tura an thlan thu hi an ziak.

Nikum October thla khan India nulate hian Asian Games an khel a, final lut mah se a vanduai zawkah an ṭang. Asian Games champion chu ni se la chuan qualifying khelh hah ngai loin Paris Olympic atan hian an tling nghal ang. Mahse, tunah chuan qualifying khelh a ngai ta zawk a ni.

Tun hnai India hmeichhe hockey team tan Remsiami hi player pawimawh a ni zel a, tun ṭumah pawh hian player pawimawh a ni leh ang. Kolasib nula hi malpui hliam vangin thla hnih deuh thaw a chawl a, tun hnaiah erawh dam takin khelmual chhungah a lut thei leh tawh.

India hi Pool B-ah United States (January 13), New Zealand (January 14) leh Italy (January 16) te nen an awm. Pool B lamah Germany, Japan, Chile leh Czech Republic te an awm thung, an inkhelh kual hnuah January 18 aṭangin knockout round an khel leh ang.