Zanin dar 1:45-ah Wigan Athletic Vs Man United

FA Cup third round-ah Manchester United-in zanin dar 1:45 hian Wigan Athletic an tlawh dawn a, Erik Ten Hag-a club chhung boruak rip tak aṭanga tal chhuahna hun ṭha a ni ang. Inkhel hi Sony Ten 2-ah a en theih dawn lo a, online-a en duh tan SonyLiv-ah a en theih bawk ang.

Wigan Athletic hi tun hmain Premier League club ni ṭhin mah se tunah erawh League One club an ni a, 18-na dinhmun hauh mektu an nih avangin an mual DW Stadium-a khel tur an ni chungin chak lo zawk tura ngaih an ni.

Mahse, Lactics hi kum 2013-a Premier League aṭanga an tlak hnu khan English knockout football-ah anni aia top flight club hneh tam an awm lo. Man United lakah pawh attacking football khel tura ngaih an ni daih.

Man United manager Ten Hag chuan, "Knockout football chu thih leh dam inkar a ni a, eng club pawh hmachhawn ila 100%-a khelh a ngai," tiin a sawi.

First team training-ah Casemiro leh Lisandro Martinez te hmel hmuh tur a awm leh tawh a, an inlan a nih pawhin a mak lo ang. Nottingham Forest laka nung ṭha tak Amad Diallo chu inkhel bul ṭan tura beisei a ni.