Brazilian legend Zagallo a thi

Player leh coach a nih laia World Cup champion vawi li ni thei, football huanga mi bik Brazilian football legend Mario Zagallo chu January 6, Inrinni khan a thi a, kum 92 mi a ni.

Zagallo hi player a nih lai chuan winger niin, khelmual hma lama khingpuite chhaih buaitu a ni. Kum 1958 leh 1962 khan Brazil chu a zawnin World Cup nomawi a chawipui a, an champion ṭum hian final-ah inkhel bul a ṭan ve ve.

Inkhelh a chawlhsan hnuah team enkawl hna thawkin, an ram Brazil hi 1970 World Cup-ah khan a champion pui. Hemi ṭum hian Pele, Jairzinho leh Carlos Alberto te a kaihruai a, an ram team awm tawh zinga ṭha ber ang hiala an sawi ṭhin kha a ni.

Kum 1994 World Cup-ah khan Brazil tan coach Carlos Alberto Parreira-a puitu assistant coach a ni a, an champion leh bawk. South American ramin World Cup vawi li an lak theih nan tha a thawh vek tihna a ni a, a sulhnu hi sawi nep theih a ni ngai lo ang.

Assistant manager a nih hnuah, kum 1998 khan manager hna a chelh leh a, hemi ṭum pawh hian final an lut. Mahse, a thlengtu France an ngam lo a, a tawp berah hlawhtling ta chiah lo mah se a sulhnu hmasa lam a ropui hle.

Zagallo hi player leh coach ni chunga World Cup champion ni thei hmasa ber a ni a, a hnuah Germany legend Franz Beckenbauer leh France tana fa hrin man hla Didier Deschamps te chuan a sulhnu hi an rawn zui ve bawk a ni.

Ama Instagram account-ah hetiang hian thu an ziak a, "Thu lungchhiat thlak tak kan sawi a ngai, World Champion vawi li ni thei Mario Jorge Lobo Zagallo chu a boral ta. Pa ṭha tak, midang tana rinchhan tlak leh nelawm, mite ngainat rawn a ni. Ram hmangaihtu leh ram tana sulhnu ṭha tak tak hnutchhiahtu a ni," tiin a inziak.

Brazil president Luiz Inacio Lula da Silva pawhin Zagallo thlahna thu sawiin, "Player ropui leh coach hlawhtling berte zing mi chu a liam ta. Brazilian mite chu kan beidawng ve ngai lo, chumi ti fiahtu zinga mi chu Zagallo hi a ni," a ti.

Zagallo hian club lamah chuan America, Flamengo leh Botafogo tan a khel a, an ram tan hian match 33 khelin kum 1965 khan inkhelh a chawlhsan. A nupui Alcina de Castro nen fa pali an nei a, kum 2012 khan a nupui hian a thihsan tawh.

Brazilian Football Confederation (CBF) president Ednaldo Rodrigues chuan, "Kan legend thihna hian CBF leh Brazilian football chu a nghawng na hle. Kan mi ngaihsan takin a kalsan tak a chhungte kan tawrhpui takzet a ni," an ti.

World Cup nomawi an chawi panga zinga paliah hmun pawimawh a chang a, an champion hnuhnung ber kum 2022 pawh khan Luiz Felipe Scolari enkawl Brazil team tan khan thurawn petu bik (special adviser) a ni - World Cup an lak tawh zawng zawngah a hming lamrik tel vek a ngai tiin a sawi theih.

FIFA president Gianni Infantino chuan, "Brazil tana a hnathawh mai bakah football huangah Zagallo sulhnu hi a ropui. An ramin a mamawh hunah a awm reng thei a, thil harsa an hmachhawn dawn leh hlawhtlinna lian an chan dawn chuan a lam an hawi mai ṭhin, tichuan ani hian chhanna a lo pe ṭhin," a ti.