Nadal-a'n Australian Open a khel dawn lo!

Rafael Nadal chuan Brisbane International quarterfinal-a Jordan Thompson a hneh loh ṭumin a mawng bawr a tihliam a, Australian Open-ah a inlan thei dawn lo. Spanish tennis star Nadal hi kum 37 mi a nih tawh avangin kum khat chhunga Grand Slam hmasa ber a khel thei lo tur hi ama tan a pawi a, Australian Open tan pawh chânna lian tak a ni.

Season khat deuh thaw hliam vanga a chawlh hnuin Nadal a inkhel thei leh tawh a, a zawnin match thum a khel. Mahse, Australian tlangval Thompson lakah 7-5, 6-7 (6-8), 3-6 in a chak lo, darkar thum leh minute 26 chhung zet an inkhel.

Set hnuhnung ber an khelh laiin Nadal hi a khel bawr hliam vanga enkawl lailawk a ngai leh a. Inkhel chhunzawm leh mah se ngai a awh tawh lo.

Nadal chuan, "Rawn kir leh tumin kum khat chhung rim takin ka thawk a, thla thum chhunga a ṭha thei ang bera inchher hriam ka tum. Melbourne mipui hmaa ka inkhel lo tur hi pawi ka ti a, chutihrualin tun season-a inlan turin beiseina sang tak ka nei," tiin Australian Open-a a khel lo tur hi a tichiang.

Kum 37 mi Nadal-a hi a mawng bawr ti hrawl a thler a, chanchin lawmawm erawh a na neihna sa a nih loh bakah a hliam hi na tak a ni lo bawk.

Spanish tlangval hian Brisbane International-ah hian match hmasa lamah Dominic Thiem leh Jason Kubler te a hneh, a inkhelh loh rei em avangin world number 672-naah a tlahniam tawh. January 14-28, 2024-a khelh tur Australian Open-ah chuan a inlan dawn lo a, vawi 14 a champion tawhna French Open atan a inbuatsaih ṭan ang. French Open hi May 20-a khelh ṭan tur a ni.