Spurs zawm tur Werner

Tottenham Hotspur chuan RB Leipzig aṭangin Timo Werner chu tun season tawp thleng atan loan hmangin an hawh dawn, a loan hun a zawh hunah Spurs hian an duh a nih chuan a ngheta la nghal thei turin an inrem bawk.

Kum 27 mi Werner hian inremna thu hi a la ziak chiah lo, mahse an inbe fel vek tawh - tun kar chhung hian an ziak fel hman ang. Tun season chawhnu lam atan bik pawh hian North London club hian a hlawh hi a vaiin an tumsak dawn a ni.

German international Werner hian tun hmain Premier League lamah sulhnu a lo nei tawh. Chelsea chuan kum 2020 khan RB Leipzig aṭang hian pound maktaduai 45-in an lei a, mahse Blues tan hian match 89 aṭanga goal 23 khungin an beisei ang a phak lo.

Bundesliga lamah bawk a kir leh a, tun season kal laiah RB Leipzig tan hian inelna hrang hrangah match 14 aṭangin goal hnih a khung tawh. Tunah chuan chona hmachhawn turin London khawpui bawk a pan leh dawn ta tihna a ni.

Leipzig manager Marco Rose chuan, "Timo hian loan hmanga chhuah a duh a, European Championship khelh ngei pawh a duh. A duhthlanna kan zahsak a, hlawhtlinna chang ngei tur pawhin kan duhsak," tiin a player a thlah fel der tawh.

Werner hian an ram Germany tan match 57 a khel tawh a, rinrawl ni thei tura ngaih pawh a ni. Mahse, club lamah a chet ṭhat miau loh avangin a tan hmun nghet chan a harsa, nikum March thlaa Belgium nen friendly match an khelh hunah ram tan a la inlan leh lo.

Kumin nipui laiin European Championship an khel dawn, ram leh ram inelna liana inlan phak ngei tumin club lamah chet ṭhat a tum ang.

Spurs hian Asian Cup khelh vangin an captain Son Heung-min an chân mek a, midfielder James Maddison chu hliam vangin a chawl mek bawk - tlarhma lama khel tur player an mamawh lai tak a ni.

January 14, Pathianni hian Tottenham hian Premier League khel turin Manchester United an lenchilh ang.