Gauff-i tan Auckland Classic title

Coco Gauff chuan Auckland Classic title a kawl lai a humhim. American tlairawl duhawm hian Elina Svitolina laka set a hloh hnuah set hnuhnung pahnih la zawnin a champion.

US Open champion hian tennis a khelh hun chhunga a nomawi pasarihna ni turin Svitolina hi 6-7 (4-7), 6-3, 6-3 in a hneh, singles match a khelh hnuhnung 33 aṭangin vawi 29 ngawt hnehna a chang tling ta a ni.

Kum 19 mi Gauff chuan, "Tun ṭum hi nomawi ka kawl lai ka humhim vawi khatna a ni a, ka tan chuan a hlu danglam hle. Season hmasa kha chuan tournament khelh laiin ruah a sur nasa, in chhungah entu awm mumal loin kan khel nasa.

"Kuminah erawh thil a danglam ta, khaw ṭha tak hnuaiah a hmuna entu tam tak awm chungin kan khel a, a nuamin a phurawm hle bawk a ni," a ti. Australian Open atan inrintawkna sang tak a neih belh thei ang.

Australian Open inbuatsaihna dang Brisbane International hmeichhe inelna huangah Elena Rybakina a champion ve bawk. Rybakina hian a khingpui Aryna Sabalenka chu 6-0, 6-3 in a hneh a, inelna lian hmachhawn turin inbuatsaihna a nei ṭha hle.