Hattrick siamtu Toney a lo kir hnai

Sum inchawina lama a lo inhman avanga thla riat chhung hrem Ivan Toney-a'n hrem a nihna a hmang zo hnai a, friendly match-ah Brentford B team tana inlanin hattrick a siam.

Brentford striker hian January 17-ah hrem a nihna chu a tuar zo ve dawn chauh a, mahse, entu awm loa friendly match khelhah chuan a inlan phalsak a ni. Brentford B team leh Southampton Under-23 inkhelah inlanin hattrick a siam.

Kum 27 mi striker hi minute 75 chhung khelmualah a inlan a, first half-ah goal hnih khungin, second half-ah hattrick siamna goal hi a khung - October khan Italian club Como nena friendly match an khelhah goal a khung a, hemi hnua goal a khung leh hmasak ber a ni.

Ruahman anga thil a kaltluang a nih chuan Toney hian January 20 zana Nottingham Forest an mikhual hunah competitive match a khel leh thei dawn a, Premier League match-ah hian bul a ṭan nghal kher erawh a rinawm lo.

Season hmasaa goal 21 ngawt khungtu Toney hi Brentford tan a lo kir leh kher ang em, tih pawh thil sawi harsa a ni a, tun dinhmunah Premier League club langsar Arsenal leh Chelsea chuan lakluh tumin an hel mek.

Hetihrual hian Brentford boss Thomas Frank chuan Toney hralh tur chuan awihawm loh khawpa tam suma dawr an ngaih tur thu a sawi a, club pahnih hian striker an mamawh miau avangin sum an theh chhuak huai viau tura ngaih a ni.