Copa del Rey - Madrid khaw club an chak

Spanish football-a club inelna ngaihhlut hlawh Copa del Rey round of 32-ah Atletico Madrid leh Real Madrid an chak a, a thiam 16 zingah an hming an ziak kai.

Atletico Madrid-in third division club CD Lugo lakah hnehna chang turin harsatna an tawk lo a, 3-1 in hnehna an chang. Atletico tan Memphis Depay chuan goal hnih khungin, Angel Correa chuan goal hmahruai a khung thung.

Real-in an ṭhenawm club chak thu hre sain match an khel a, fourth division club Arandina CF chu 3-1 in an hneh. Real tan Joselu (penalty), Brahim Diaz leh Rodrygo ten goal khat ṭheuh an khung a, Nacho Fernandez chuan an lamah a tilut bawk.

Round of 32 inkhel dangah nizan khan club langsar Barcelona an inlan a, an result kan hre hman lo. Catalan club hian fourth division club UD Barbastro an lenchilh a, an chak ngei a rinawm.

Hei le Atletico

Atletico Madrid-in inelna hrang hranga an match hnuhnung paliah vawi khat chiah hnehna an chang a, hei vang hian third division club lenchilh ni mah se Diego Simeone-a'n fimkhur takin a player-te a rem a, Alvaro Morata leh Antoine Griezmann te pawh bench-ah dah zet mah se, khelmual a luhtir tho.

La Liga club hian minute hnihna lekah Angel Correa hmangin goal hmahruai an khung a, "Goal engzat tak khung belh ang maw?" tiin zawhna awm hman mah se, Lugo tan Leandro Antonetti chuan minute 39-naah si phurh a sut a, 1-1 in chawlhlawk an hmang!

Second half-ah Atletico-in an zia tak tak an pholang a, Depay a inlar - Morata leh Griezmnann awmnaa hmun chang phak meuh lo Dutch forward hian a thiam a la theihnghilh lo tih pholangin goal hnih a khung.

Atletico Madrid-in hnehna an chang a, Nilaini zan dar 12:30-a Real Madrid nena Spanish Super Cup semifinal an khelh tur atan an ngaihtuahna an seng zui thei ang.

Goal li luhna

Arandina khelmualah Real Madrid an chak chiang. Mahse, Spanish club langsar hian goal khung turin second half thleng an nghah a ngai a, chu pawh penalty a ni - Joselu chuan penalty hi goal-ah a chantir.

Real hian an player chhuanvawr Jude Bellingham, Luka Modric leh Antonio Rudiger chu bench-ah an dah a, hliam dam hlim Vinicius Jr chu squad-ah pawh a tel lo. Mahse, fourth division club laka talbuaina tur erawh a ni lo.

Brahim Diaz chuan minute 55-naah Real goal hnihna a khung ve leh a, Carlo Ancelotti naute hian 77.7% zet ball changin, vawi 15 shot an nei - Arandina lam hian vawi hnih shot an nei ve hram.

Real tan hun pek belhah Rodrygo chuan chak nemnghehna goal a khung zui a, mahse, Brazilian forward goal khung hnu lawkah hian Madrid defender Nacho chuan an lamah tilutin, an clean sheet thei lo.

Real tan Guler

Spanish club lawmna tizual turin Arda Güler chuan Real a pan hnua a match hmasa ber a khel a, goal khung nghal lo mah se a che vel a hmuhnawmin, goal khungna chance pawh a nei - freekick hmanga post a pet per kha a ui vawng vawng ang.

Kum 18 mi Guler hian nipui transfer-ah khan Fenerbahce aṭangin Real hi a zawm a, euro maktaduai 20 man attacking midfielder hian pre-season-ah khup hliam a nei zui. A khup hliam dam hnuah tihrawl hliam vangin a buai leh a, January-ah Real tana a match hmasa ber a khel ve chiah.

Mahse, Turkey tan vawi li inlana goal khat khungtu hi a hmuhnawm nghal a, an club hmachhawn erawh Spanish fourth division club an nih avangin insawi vul chuk a la rem lo.

Real boss Ancelotti chuan, "100% in a taksa a la inpeih tawk lo a, mahse, a theihna erawh a pholang. Team tana a khelh ṭan ve hi a tan a pawimawh. Kan dawhtheih a ṭul a, first half-ah khan a quality a pholang," a ti a, a player chuan a taksa leh tharum lamah hmasawn zel a la mamawh thu a sawi bawk.