Eric Dier hma hun a chiang lo

Bayern Munich nena sawizawm hlawh mek, Tottenham Hotspur defender Eric Dier hma hun a chiang lo a, he thuziak i chhiar meuh chuan a chiang tawh hial zawk thei bawk!

Kum 29 mi defender hian Spurs boss Ange Postecoglou hnuaiah hmun a chang phak lo a, tun season-ah match li chiah a la khel. Spurs hian hliam vanga centre back pahnih Cristian Romero leh Micky van de Ven an chhawr theih loh lai pawhin Dier hi an chhawr lo.

Spurs hian Inrinni zan khan FA Cup third round-ah 1-0 in Burnley an hneh a, Pedro Porro chuan goal awmchhun a khung. He inkhelah hian Romero leh hliam dam hlim van de Ven te la chhawr theih loh mah se full back Ben Davies chu centre back turin Postecoglou hian a ring zawk!

Inkhelh zawhah Postecoglou hian Davies inhliam thu a sawi a, heti chung hian Dier chu chân dawn mah se, "A tel lo pawhin kan ti thei ang," a ti a, English defender tan London club-a cham reng hi thutlukna âtthlak mai niin a lang tawh.

Hetihrual hian Postecoglou chuan Dier chuan a taksaah na a neih thu sawiin, "A transfer chungchang hi engmah ka hre lo," a ti! Postecoglou chuan sawi zawmin, "Hliam a nei ka tih chuan a nei a ni mai. Niminah pawh training a nei lo a, induh a nih chuan zawt ve mai ru - inhliam lo se, "Ka thlang lo a ni," ka ti mai ang," a ti a, dawt a sawi loh thu a sawi.

Postecoglou-a'n engmah a hriat loh thu a sawi laiin football journalist lar Fabrizio Romano chuan Dier hian German club a zawm hnai niin a sawi a, "Bayern kutah engkim a awm tawh. Dier hian club thutlukna chiah a nghak tawh a, karlehah Bayern squad zawm theih a inbeisei hial. Contract chungchangah inremna a awm tawh," a ti.

Nipui transfer lai khan Bayern boss Thomas Tuchel chuan Dier hi lakluh a lo tum tawh a, mahse, English defender hian kum thum contract a duh avangin an inrem thei lo. Tunah erawh thawnthu a dang ta a, Dier hian German club hi zawm a duh - Tuchel pawhin Dier hi a la duh reng a, club thuneitu lam thutlukna a ngaichang mek.