Joshua-a'n UFC star Ngannou a hmachhawn dawn

Anthony Joshua promoter Eddie Hearn chuan a boxer leh UFC star Francis Ngannou an inhnek tur thu a tichiang a, X (twitter) lama Hearn-a tarlan dan chuan fighter pahnih hi Riyadh, Saudi Arabia-ah an intawng dawn a ni.

Kum 34 mi Joshua hian December thla tawp lamah khan Otto Wallin chu Saudi-ah inhnek puiin a hneh a, ruahman dan chuan American boxer lar Deontay Wilder nen inhmachhawn zui tur an ni. Mahse, Wilder hian Joshua chak zanah rin loh takin Joseph Parker a ngam lo a, Joshua nena an inhnek tura ngaih chu a thleng thei ta lo.

Hei vang hian Joshua inhnekpui tur boxer langsar dap zui a ni a, UFC fighter Ngannou lam an hawi. Hearn chuan, "Anthony Joshua vs Francis Ngannou chu Riyadh, Saudi Arabia-ah ropui takin a thleng dawn e," a ti.

UFC heavyweight champion hlui Ngannou hian October khan professional boxing-a a match hmasa ber khelin, WBC heavyweight champion Tyson Fury lakah split decision-in a tlawm a, mi tam tak chuan 'The Predator' hming lem an pek Ngannou hi chak zawkah an ngai hial.

Kum 37 mi Ngannou hi WBC chuan heavyweight ranking-ah 10-naah an dah nghal a, Joshua tan awlsam taka chak theih a ni dawn lo tih a lang - fighter pahnih hi March 9-a inhmachhawn tur anga sawi an ni a, thuchiang erawh a la awm lo.

Hearn chuan, "January 15 khian London-ah press conference neih a ni ang a, he fight chungchanga hriat tur pawimawh dang chu puanzar a ni ang," a ti a, a hun la puangzar lo mah se, fighter pahnih hi an intawng ngei dawn tih erawh a chiang.

Hetihlai hian Fury leh Oleksandr Usyk te chu February 17 khian an inhmachhawn dawn a, he inhneka chak zawk chu kum 1999 hnua boxing-a major title zawng zawng kawl thei hmasa ber an ni ang.

Kum 35 mi Fury hian WBC heavyweight title a kawl mek a, a hmachhawn tur, kum 36 mi Usyk hian Joshua kawl lai a chhuhsak tak WBA, WBO leh IBF heavyweight kawnghren a kawl thung.