A tawpah Inter an vannei

Serie A hmahruaitu Inter Milan chuan Inrinni zan khan hun tawp dawna Davide Frattesi-a goal hmangin Verona 2-1 in an hneh hram a, table hmahruaitu an nihna an sawhnghet chhunzawm.

San Siro-a inkhelah Inter hian striker ṭha Lautaro Martinez hmangin goal hmahruai an khung a, mikhual lamin hun tawp dawn hnaiah Thomas Henry hmangin an sut, hun pek belh an khelh laiin Frattesi chuan chakna goal a rawn khung hram.

Inter an kang sang a, an striker Martinez chu club dangin an hel mek thung. Mahse, Argentina international hian Inter Milan chhuahsan tumna a nei rih lo tih a sawi nawn, a club tan chuan chanchin ngaihnawm a ni ang.

Tun season Serie A goal 16 khung tawhtu Martinez chuan, "Contract thar ziak turin tih ngai a tam tawh lo, tunah hian kawng dik kan zawh mek a ni. Ka tan chuan nikum kha hun duhawm a ni a, kuminah pawh chhunzawm leh ngei ka duh," a ti.

An ram tan Copa America nomawi a chawi hnuah FIFA World Cup an champion leh a, club lamah Italian Super Cup an lak bakah Champions League final an lut bawk, kuminah Serie A champion thei dinhmunah an ding mek.