Laipui a tlawlh, Liverpool hmaah a zâm ral

Arsenal-in Liverpool lakah vawi 18 zet shot neiin, game hmuhnawm pho chhuak mah se, a hmawr bawktu an nei ṭha tawk lo a, Emirates Stadium-ah Laipui a puak thei lo.

Pathianni zan khan FA Cup third round-ah Arsenal-in Liverpool an mikhual a, Mikel Arteta nauten tun hnaia an result duhawm lo thai bo tum mah se belhchhahin a awm ta zawk a, Reds-in Jakub Kiwior (own goal) leh Luis Diaz goal hmangin 2-0 in an hneh.

Arsenal hian inelna hrang hrangah match li chhung a zawnin hnehna an chang zo ta lo a, a zawnin match thum an tlawm ta. Heng zinga match hnihah hian an elpui Liverpool an hmachhawn a, vawi khat draw in, vawi khat an tlawm - inenfiah an mamawh.

Arteta nauten League Cup leh FA Cup an mangṭha ta a, tun season-a champion an beiseina chu Premier League leh Champions League chiah a ni tawh - hmabak a awlsam dawn lo.

A hmawr bawktu

Arteta hnuaian Arsenal-in game mawi an pholang a, first half an thunun. Gunners tan hian Martin Odegaard chuan bar a tihper a, Reiss Nelson leh Kai Havertz te pawhin chance duhawm an nei a, mahse, an chance neih an chhawr thei lo thung.

Arsenal vanneih zan ni se, goal khung ngeia chawlhlawk hmang thei tur an ni a, mahse, goal hmaah an hriam tawk lo - chumiin a pholan chu number 9 diktak an mamawh tih hi a ni a, a hmawr bawktu an nei lo.

Gunners tan khup hliam vanga inlan thei lo Gabriel Jesus awm lo chu chhuanlam thei a ni a, mahse, Liverpool leh Manchester City el phaka inngai team tan Brazilian striker vantlang hi innghah nan bera hman reng a chi loh.

Bench aṭanga luhtir Eddie Nketiah hi striker pangngai tak ni mah se, 'world class' huanga chhiar tel chi a ni lo a, thlasik transfer-ah Arsenal-in uluk zawka Brentford striker Ivan Toney an rim a ṭul.

Liverpool nge nge

First half-ah Arsenal khel ṭha zawk mah se, Liverpool-in chance nei lo an ni bik lo - Trent Alexander-Arnold chuan bar a pet per a, Luis Diaz khung tura ngaih chu Aaron Ramsdale chuan ṭha takin a dansak a, Diogo Jota chuan woodwork a tihper ve bawk.

Minute 80-naah Liverpool-in goal an khung ta nge nge a, Arnold-a freekick aṭanga ball kal chu Kiwior chuan a lua lo tauh thawiin, Ramsdale tana man rual lohin a lut - Arsenal khelmualah Liverpool thawm a ring zawk.

Liverpool hi 1-0 hian an haw mai dawn niin a lang hman. Mahse, Diaz-a'n a lo la duhtawk ve lo a, Colombian forward hian Jota siamsak chu hun pek belhah chiang zetin goal-ah a chantir a, 2-0 in Liverpool an chak.

Premier League hmahruaitu Liverpool hian Nilaini zanah League Cup semifinal chu Fulham nen an khel zui dawn a, FA Cup-ah fourth round an lut a, Europa League-ah round of 16 an lut tawh bawk.

Salah tel lohna

Liverpool-in an thiampuipa Mohamed Salah chu Africa Cup of Nations khelh vangin an chhawr thei lo a, Salah awm lo mah se Diaz a rintlak a, bench aṭanga luhtir Jota-a'n a dam chiang tawh tih a pholang bawk.

Captain Virgil van Dijk pawh damlohna avangin a inlan thei lo a, mahse, Ibrahima Konate-a'n VVD tel lo pawha a inrintawkzia pholanna remchangah a hmang a, Joel Matip awm lo mah se defender ṭhangduang Jarell Quansah-a'n a hmun ruak a hnawh khat hneh hle.

Hetihrual hian tlarhmaah Darwin Nunez chu a changtupa aiah 'a ṭhelhtupa' a la ni reng a, Uruguayan striker hian goal khung a zir ṭhat a pawimawh - tun season inelna hrang hrangah match 29 khelin goal riat chiah a la khung.

Nunez-a chance neih zozai thlir chuan, tun season-ah goal riat aia tam khung tawh tur chu a ni tih a lang a, pound maktaduai 85 thlenga a man sang chho thei tura an lei striker hian a man a phu tawk tih a pholan a hun tawh.

Thlasik chawlh aiah FA Cup replay!

Premier League club pasarih chuan FA Cup third round-ah an khingpui an inhnehtawkpui avangin, replay match an khelh a ṭul a, hei tun thlaa thlasik chawlh an neih turah an khelh a ṭul dawn!

Crystal Palace, Everton, Brentford, Wolves, Luton Town, Nottingham Forest leh West Ham te chuan hnehna an chan zawh miau loh avangin replay an khelh a ṭul dawn a, an zinga club pathum hi replay-ah an chak a nih chuan December 23 leh January 30 inkarah match riat an khel dawn tihna a ni.

Premier League chuan club tinten kar khat ṭheuh chawlh an neih theih nan ruahmanna siamin, January 12 - January 14 inkarah match nga chiah an awmtir a, January 20 - January 22 inkarah match nga dang a awm leh ang.

Mahse, FA Cup third round-a an khingpui draw tute chuan heng chawlh karah hian FA Cup replay an khelh a ṭul a, thlasik chawlh an hmang ve thei dawn lo.

Kan khel ṭha a, chance pawh kan ngah hle. Hnehna chang mai tur kan ni a, mahse, kan tlawm a, kan si phurh kan sut lo - chak tur chuan si phurh sut a ngai alawm! Europe-a team ṭha ber lakah kan khel ṭha zawk a, chance kan insiam hnem a, Liverpool laka khati zat chance insiam thei team kha ka la hre lo.

Mahse, chuti chung chuan a tawk zo chuang si lo. Khatiang taka inrintawkna nena an khel chunga kan chak zo lo a nih chuan engtin nge ka tih chuan ang? Ka naute hi 100% in ka la thlawp thlap a, kan khelh dan ngaia khelh reng a, chance hlah loh kan tum a ngai a ni.

- Mikel Arteta, Arsenal manager

Ka naute ka chhuang takzet - third round-a hmachhawn theih zinga hautak ber ang hial kan chang a, thil tam tak ngaihtuah chunga Emirates panin, Arsenal lahin fing takin an lo insiksawi bawk si! Keini pawh chawlhlawk hnuah kan inthlak danglam hret a, second half-ah kan khel ṭha hle. Chuvang chuan naupang zawk tan khelhna chance pawh kan siamsak thei a, minute 95 chhung kha chu beidawng loin kan bei - replay khelh ngai loin thlasik chawlh kan nei thei dawn e!

- Jurgen Klopp, Liverpool boss