Zverev hoin Germany an champion

Ram leh ram, mipa leh hmeichhe inpawlh tennis team hmanga inelna United Cup khelh zawh takah Germany an champion. Alexander Zverev awmna German hian Iga Swiatek-i awmna Poland hnehin nomawi an chawi a ni.

Hmeichhe singles an khel hmasa a, world number 1 Swiatek chuan Angelique Kerber chu 6-3, 6-0 a hnehin Poland chu dinhmun ṭhaah a dah. Mipa singles khelh zui niin, world number 7 Zverev-a'n Hubert Hurkacz chu 6-7 (3/7), 7-6 (8/6), 6-4 a hneh letin ram pahnih an intluk tawk.

Mixed doubles hmanga chak tur zawn niin, Zverev leh Laura Siegemund-i te ṭangdun chuan Swiatek-i leh Hurkacz-a te inkawp chu 6-4, 5-7, 10-4 in an hneh a, match thum an khelh zawh hnuah Germany hi 2-1 in an chungnung.

Zverev chuan, "Ram pahnihte kan inthlau lo hle, kan inkar zau zawng kha tlemte chauh a ni. Kan ram tana hlawhtlinna kan chang hian min tilawm, mimal hlawhtlinna a hlut rualin ram tan a nih tawh chuan boruak a danglam ṭhin," a ti.

Tun hma deuh khan Zverev hian a kerekah hliam na tak a tuar a, hun rei tak a inkhelh theih loh bakah a lo kir leh hnuah pawh ngai a awh mai lo. Tunah erawh nuamsa takin a inkhel thei leh tawh, a vawi khat nan Grand Slam champion nih a tum leh ang.

A chak lo lam Poland thiampuinu Swiatek chuan, "Poland tan kan theihna zawng zawng kan hlan, hlawhtling zo ta chiah lo mah ila mimal tak chuan ka khelh danah ka lawm. Season thar inbuatsaihna ka hmang ṭha leh tih a takin a lang niah ka ngai.

"Tun tournament kan khelh chhungin singles match ka khelh zawng zawngah ka chak vek, hei hi ka tan chanchin lawmawm chu a ni tho," a ti. Australian Open atan a inpeih thu a sawi tel bawk.

Tennis season an ṭan chho a, inelna lian Grand Slam pali zinga a hmasa ber Australian Open 2024 chu January 14-28 chhung hian Melbourne Park-ah an khel ang.