Brazil coach thar tur Dorival Junior

World champion vawi nga ni tawh Brazil chuan coach thar an nei dawn, team enkawl tur hi la puang chiah lo mah se Dorival Junior a ni dawn tih erawh a chiang tawh a, kum 2026 FIFA World Cup thleng a enkawl ang.

Dorival-a hian a club enkawl lai Sao Paulo chu a chhuahsan fel tawh, club a chhuahsan thu hi X (tun hma Twitter) lamah an ziak tawh. Brazilian Football Confederation (CBF) chuan hun rei vak lo hnuah an coach thar atan an puang ang.

Kum 61 mi Dorival chuan, "Duhthusam a thleng dik," tiin a sawi der tawh.

Kar hmasa khan Brazil hian an team enkawl lailawktu Fernando Diniz chu an lo mangṭha tawh a, inthlak danglam an mamawh.

World Cup khel tura South American ram 10 inel zingah Brazil hi parukna an ni mek a, beisei angin qualifying an khel ṭha lo. Dorival hi coach nghet a ni dawn a, a match hmasa atan kumin March thla hian Europe khawmualpuiah England leh Spain te nen friendly match an khel ang.

Dorilval-a'n tun hmain Flamengo chu Copa Libertadores title leh Brazilian Cup 2022 a lo lakpui tawh, chumi hnuah Sao Paulo a zawm - nikum khan a vawi khat nan Brazilian Cup a lakpui a ni.

Club lamah hian tawnhriat a ngah - Atletico Mineiro, Athletico Paranaense, Internacional, Vasco da Gama, Fluminense leh Palmeiras te a enkawl tawh bawk a, Brazilian football hrechiangtu a nihna hi an duh chhan langsar a ni ang.