Zaninah League Cup semifinal : Middlesbrough mikhual tur Chelsea

Zanin dar 1:30 hian Carabao Cup semifinal-ah Middlesbrough leh Chelsea te an inkhel dawn. League Cup semifinal hi double leg-a khelh tur a ni a, first leg hi Boro khelmual Riverside Stadium-a khelh tur a ni.

Inkhel hi fancode-ah en theih dawn a, Carabao Cup inkhel hi Rs 69-in a en theih. Semifinal hnuhnung zawkah Premier League club pahnih Liverpool leh Fulham te January 10, Nilaini zanah an inkhel ang.

Semifinal kalkawng

Middlesbrough hi Championship club an ni a, first round aṭangin an khel ṭan. Boro hian first round-ah Championship club tho Huddersfield Town chu khualmualah 3-2 in an hneh hram. Second round pawh khualmualah bawk an khel a, League One club Bolton Wanderers chu 3-1 in an hneh.

Third round-ah Bradford City 2-0 in an henh a, League Two club pawh hi khualmualah tho an hmachhawn. Fourth round-ah League One club Exeter City 3-1 in an hneh a, quaterfinal-ah League One club tho Port Vale 3-0 an hneh. Michael Carrick-a hote hi khualmualah vek khel mah se an vannei a, Premier League club hmachhawn miah loin semifinal an lut.

Chelsea hian Europe inelna an hmachhawn loh avangin third round aṭangin an khel ṭan a, Premier League club Brighton & Hove Albion chu Stamford Bridge-ah 1-0 in an hneh.

Boro ang lo takin Blues erawhin an mualah vek an khel a; fourth round-ah Championship club Blackburn Rovers 2-0 a hnehin quarterfinal-ah Newcastle United nen hun pangngaiah 1-1 a an inhnehtawk hnuin penalty-ah an vannei zawk. Mauricio Pochettino hote semifinal kalkawng hi a hautak hle.

Boro hi...

Middlesbrough hian League Cup nomawi hi kum 2004 khan an chawi tawh a, khatih hunlai kha chuan Premeir League club an nih bakah khawvel huap pawha player langsar an kawl. Tuna England coach Gareth Southgate hi captain a ni a, Spanish midfielder Gaizka Mendieta, Brazilian midfielder Juninho leh Dutch midfielder Boudewijn Zenden te an ni nawk.

Tunah erawh Boro team-a hriat hlawh ber chu an coach Michael Carrick a ni a, an player-ah hming langsar an awm lo. English forward Morgan Rogers-a'n League Cup-ah goal li a khung tawh a, kum 21 mi Rogers hi England tan kum bithliah inelna hrang hrangah a tel vek.

Ivorian forward Emmanuel Latte Lath hi kum 25 mi a ni a, Atalanta aṭanga inzir chhuak niin loan hmangin a khel chhuak tam hle. July thla khan Boro hi zawmin inelna hrang hrangah goal ruk a khung tawh. Boro hian kartawp khan FA Cup-ah Aston Villa 1-0 in an hneh lo a, Championship club ni mah se Premier League club tan zuam chi an ni lo ang.

Nomawi beiseina

Mauricio Pochettino hnuaiah Chelsea-in nomawi beiseina an nei a nih chuan League Cup hi a awlsam ber tura ngaih a ni a, Wembley Stadium thleng turin match hnih chiah khelh a ngai tawh a, nomawi chawi turin match thum chiah a ngai tawh tihna a ni.

Blues hian kartawp khan Championship club Preston North End chu 4-0 in an hneh a, Preston hi league-ah 14-na niin Boro ai hian point khat chauhin an hmu tlem. Championship-a an dinhmun thlir chuan Blues tan Wembley Stadium a hnai hle.

Chelsea hian tun hnaiah hma an sawn a, match hnuhnung pathumah an chak vek. Preston lakah Armando Broja, Thiago Silva, Raheem Sterling leh Enzo Fernandez te hmangin goal an khung a, goal an chhuah lo.

Blues hian Boro lakah hian inhliam vanga Preston la hmachhawn lo Christopher Nkunku an la beisei a, French forward hi a dam hman lo a nih pawhin Championship club hneh turin an squad a la ṭha tawk.