5 star City : De Bruyne a lo kir

FA Cup third round-ah Manchester City tan hliam vanga hun rei tak inlan thei lo playmaker Kevin de Bruyne a rawn kir a, Pep Guardiola hoten Huddersfield 5-0 in an sawp. Man City hian January 13, Inrinni zan hian Premier League-ah Newcastle United an tlawh dawn a, KDB rawn let hian phurna nasa tak a pe ang.

Etihad Stadium-a inkhelah Phil Foden-a'n goal hnih a khung a, Julian Alvarez leh Jeremy Doku ten goal khat ve ve khungin Huddersfield left back Ben Jackson-a'n an lamah a tilut. Doku goal khung hi Belgian midfielder siamsak a ni.

City an thiam

Huddersfield hian an khingpui an hre chiang a, FIFA Club World Cup-a champion zo hlim City hmaah risk lak an tum lo. Championship club hian goal venhim hna an thawk a, mah se minute 33-naah goal an chhuah tho.

Mateo Kovacic-a ball pek chu box chhungah Julian Avarez-a'n changin a ball pek chu Foden-a'n a la thla a, English midfielder hian angle zim tak aṭangin a pet lut. Foden-a'n goal a khung lai hian box chhungah goalkeeper chhiar telin Hudderfield player 10 an awm!

Minute li hnuah City-in mawi zetin Huddersfield an ṭhiat. Sergio Gómez leh Foden ten wall pass hmangin tlarhnung an ṭhiat a, Gomez-a cross chu Rico Lewis-a'n khawih pengin Alvarez-a'n a tawp a khar.

De Bruyne a rawn kir

Kevin de Bruyne-a'n hliam vangin Premier League match khat chauh a khel a, minute 57-naah Alvarez a rawn thlak. Eithad Stadium-a mipuiin kut bengin KDB an rawn lawm a, a thiam ngaiin a la thiam reng.

Minute 58-naah Oscar Bobb-a cross chuan Ben Jackon-a a per a, goalkeeper Lee Nicholls tan chet ngaihna a awm lo. Goal lina pawh team goal tho a ni a, minute 65-naah Kovacic-a flick chu Foden-a'n box pawn chiah aṭangin goal kilah a pet lut.

De Bruyne-a'n goal rawn khung nghal lo mah se goal-ah erawh a rawn inrawlh ta tho. Minute 74-naah KDB-a cross chu Doku-a'n chiang zetin a pet goal. City-in 5-0 in hnehna an chang a, FA Cup champion lai hian champion nawn an tum tih a pholang.