Powerlifting-ah Mizoram an champion

North East India Open (Men & Women) Classic & Equipped Powerlifting Championship 2023-ah Mizoramin gold pakua lain a pumpuiah an champion.

Saron Veng tlangval Lalhmangaihsanga (Tetea) chuan 93 kgs category-ah gold medal a la a, strongman of NorthEast India atan thlan a ni. Tetea hi Mizoram Pachak ber ni lai mek a nih bakah Mr Mizoram ni lai a ni bawk.

Inelna hi January 5-6, 2024 chhung khan Silchar, Assam-ah neih a ni a, Mizoram Powerlifting Association (MPA) chuan lifter 12 leh official pahnih coach F. Lalmawipuia, Ramthar Veng leh manager Lalrinsanga, Mission Veng te an tir a. Mizoram aiawha kal 12 aṭangin mi 11-in medal an dawng a, MPA chuan thuchhuah siamin Mizoram team-a kal lifter-te an chhuan thu an tarlang.