Australian Open atan Rybakina a inpeih

Elena Rybakina chuan inrintawkna sang tak nen Australian Open a khel thei dawn. Grand Slam atana inbuatsaihna zinga mi Brisbane International final-ah world number 2 Aryna Sabalenka hnehin nomawi a chawi.

Russia rama piang, mahse Kazakh khua leh tui ni chhunzawm ta zawk Rybakina hian darkar khat leh minute 13 chhungin 6-0, 6-3 in hnehna a chang a, season hmasa Australian Open final-a a ngam loh Sabalenka a hneh tak avangin a phur zual hle ang.

World number 4 Rybakina chuan, "Kan score line en chuan a awlsam hmel a ni mai thei, a takah erawh inkhel harsa tak a ni," a ti. Player pahnih intawn hmasak pasarihah chuan set thum hautak tak an khel vek a, tun ṭumah erawh straight set hmangin a chak.

Hard court inelnaah Rybakina hi a che ṭha hle, tun ṭum tournament bikah hian match vawi li a khelh rei zawng hi darkar thum leh minute 40 chauh a ni a, harsa lutuk loin hnehna a chang thei zel tihna a ni.