Barca an chak - lawm erawh a kim lo

Copa del Rey round of 32-ah Barcelona chuan 3-2 a Barbastro hnehin round of 16 an lut a, lawm erawh a kim lo - an team hneh hi fourth division club an ni a, harsa takin an chak hram.

Barcelona hian Fermín López leh Raphinha goal khung hmangin 2-0 in hma an hruai reng a, awlsam taka chak tura ngaih an nih laiin Barbastro tan Adriá De Mesa Garrido chuan si phurh a rawn sut ṭhen.

Catalan club hlauthawng tihreh nan Robert Lewandowski chuan penalty aṭangin a khung ve leh a, mahse, hun pek belhah Spanish fourth division club tan Marc Prat chuan si phurh a rawn sut ṭhen ve leh!

Mahse, Barca-in minute 88-naa an penalty hmuh vanneihpuiin, si khatin an chak a, Atletico Madrid leh Real Madrid hnung zuiin, Spanish Cup last 16 an lut.

Beisei phak lo

Barca-in an ṭhat dan berin khel hran lo mah se, bul ṭantu zingah Jules Koundé, Frenkie de Jong, Ferran Torres, João Félix leh Raphinha te ho an awm avangin fourth division lakah chuan chak awlsam tura ngaih an ni.

Beisei ang ngeiin goal pawh an khung hma a, Fermín López chuan minute 18-naah Raphinha siamsak chu goal hmahruai ni turin a khung. Brazilian forward Raphina hian minute 51-naah a khung ve leh bawk.

Raphinha goal khung hi Hector Fort siamsak ṭha zet a ni a, kum 17 mi Fort tan professional football-a a match hmasa ber a ni - Spanish right back hi a khel ṭha takzet a, hmabak a nei êng hle.

Barca-in 2-0 a hma an hruai hnuin awlsam taka chak turah an inngai tawh. Mahse, Barbastro tan Adrià de Mesa chuan si phurh a rawn sut ṭhen ve leh a, Spanish fourth division club stadium lian lo taka mipui 6,000 thawm chu ring tak a ni.

A tawpah Barca

Barcelona boss Xavi-a'n a hlauthawng tih hai rual a ni lo. Goal an chhuah hnuah a striker neih ṭhat Robert Lewandowski a luhtir a, mahse, Polish striker luh hnuah pawh goal khung turin penalty an mamawh.

Kum 35 mi striker hian penalty hi goal-ah a chantir a, 3-1 a ni. Mahse, Barbastro hian penalty hmu ve lehin, Marc Prat chuan goal-ah a chantir - hei erawh hun pek belh a ni tawh a, Barca an vannei.

Barca coach Xavi chuan, "First half kan khel ṭha a, kan chesual ṭep a ni. Awlsam takin kan chak mai dawn niin a lang hman a, mahse, hetiang game hi chu hriatthiam a harsa ṭhin a ni," a ti a, fourth division club lakah an talbuai tih a pha lo.

Xavi chuan sawi zawmin, "First half kan khelh ṭhat miau avangin lawm takin ka haw a, Fort leh Fermín López ten an khel ṭha em em bawk," a ti a, rawlthar pahnih an khel ṭha ringawt pawh chu lawmna tur a nih thu a sawi.