Juve leh Milan chak laiin Napoli chak lo
Serie A champion tum Juventus leh AC Milan te chuan hmahruaitu Inter Milan an um zel - champion lai Napoli erawh an che fuh hleithei lo, an mikhualna tamah Torino chu 3-0 in an ngam lo.
Juve hian Salernitana chu 2-1 a hnehin point 46 an hmu a, an chunga awm Inter an phak lohna chu point hnih chauh a ni. Pathumna ni lai Milan pawhin Empoli 3-0 a hnehin point 39 an hlawh chhuak ve ta bawk.
Allegri a hlim
Salernitana mualah Juventus hian goal an chhuah hmasa, mualneitu lamin Giulio Maggiore hmangin chawlhlawk hmain goal an khung a, second half lamah Old Lady hian Samuel Iling-Junior hmanga an sut bakah, hun tawp dawnah Dusan Vlahovic chuan chakna goal a khung.
Juve manager Massimiliano Allegri chuan, "Kar laihawlah Coppa Italia kan khel a, kar tawpah Serie A match hautak khelin goal kan chhuah hmasa bawk, chumi hnua kan thawh leh dan khan min tilawm hle," a ti.
Old Lady elpui ber Inter Milan hian Inrinni zan khan Hellas Verona chu 2-1 in an hneh, hun tawp dawna Davide Frattesi-a goal hmangin Inter an chak. Goal luh hma hian Alessandro Bastoni chu a foul ngei niin a lang, Referee’s Association chief Andrea Gervasoni chuan goal chu pawm loh tur niin a sawi.
Goal hi pawm loh tur niin lang mah se a hun laiin an pawm tawh a, awmzia a nei tawh lo. Inter kha chak zo lo ni se la chuan Juve nen an point a inang chiah ang. Allegri chuan thil kal tawh chu siamṭhat theih a nih loh thu leh, an hmabakah chak taka an kal tur thu a sawi.
Milan chak chiang
AC Milan chuan Ruben Loftus-Cheek, Olivier Giroud leh rawlthar Chaka Traore te goal khat ṭheuh khung hmangin Empoli 3-0 in an hneh a, tlak hlauhawm china awm team lamin a chhan letna tur an nei lo.
France international Giroud hian Borussia Dortmund nen Champions League an khelh ṭumin penalty a hlah a, tun ṭumah hian chhuih nawn lehin a hlah ta lo - tun season kal laiah goal 10 a khung tling leh a, a zawnin season 14 chhung chu goal 10 a khung tling ziah.
Milan hian Coppa Italia quarterfinal-ah Atalanta an mikhual zui dawn a, tun kartawpah Serie A khel turin AS Roma chu San Siro-ah an lo dawngsawng chhunzawm leh ang, an hmabak a hautak chho dawn hle.
Pathianni zan inkhel dangah Roma hi Atalanta nen 1-1 in an inhnehtawk. He inkhelah hian Roma manager Jose Mourinho chu yellow card vawi hnih hmuh vangin hnawhchhuah a ni a, an match lehpeka Milan an tum hunah a naute a ho thei dawn lo.
Napoli chak lo
Kum khat liam ta lekah kha chuan Napoli fan-te chu phur takin Turin khawpuiah an zin lut a, 'Serie A kan champion dawn' tiin au rual chungin Torino an tlawh a, 4-0 a chakin a hnuah an champion zui a nih kha.
Hnehna hlado an chham tawhna khelmualah bawk khan an leng lut leh a, mahse tunah chuan 3-0 ngawtin an tlawm ta. Minute lina lekah Naples club defender Pasquale Mazzocchi chu hnawhchhuah a ni a, a ṭhiante tan tihtheih dang a awm lo.
Serie A champion puitu coach Luciano Spalletti a chhuak a, amah thlaktu Rudi Garcia chu nikum November thla khan an ban. An manager ṭang lai Walter Mazzarri kaihhruaina hnuaiah match 10 aṭangin vawi thum chak an chak, vawi ruk ngawt an tlawm.
Napoli sporting director Mauro Meluso chuan, "Mazzarri chungah rinna kan nghat a, tunah hian inthlak danglam tumna a awm rih lo. Ani hian kan dinhmun a hrechiangin harsatna pawh min sutkian pui ngei ang," a ti.