PSG chakna Mbappe-a hattrick

Paris Saint Germain chuan Kylian Mbappe-a goal thum khung hmangin Revel chu 9-0 tehmeuhin an sawp a, inelna hi French Cup round of 64 chauh la niin result hi a mak hran lo.

Revel hi France rama football inelnaah chuan division parukna an ni a, an khingpui PSG erawh inelna sang ber Ligue 1 champion leh hmahruai mektu an ni thung - an player neih dan leh sum neih pawh khaikhin chi a ni lo.

Mbappe bakah hian Randal Kolo Muani chuan goal hnih a khung a, Marco Asensio, Goncalo Ramos leh Cher Ndour ten goal khat ṭheuh khungin, mualneitu lam player N'Guessan chuan anmahni lamah a tilut bawk.

French Cup bikah Mbappe hian match 22 a khelh aṭangin goal 30 a khung tawh - Paris Saint Germain tana goal khung hnem ber a ni der tawh a, a record hi a sawhnghet chho zel pawhin a rinawm.

Kum 25 mi Mbappe-a'n PSG tana a contract neih lai hi kumin nipui bazar rual hian a tawp dawn a, a hma hun tur an inrinsiak mek - tun hnai khan France captain hian Paris club lo chu ngaihtuah dang a neih rih loh thu a lo sawi tawh.