James hoin Lakers an chak

LeBron James-a point 25 neih hmangin Los Angeles Lakers chuan Los Angeles Clippers chu 106-103 in an hneh a, hnehna an chan theih nan hian Anthony Davis pawhin point 22 a nei ve bawk.

Lakers hian season an hmang ṭha lo, tun hnaiah phei chuan a zawnin match li an tlawm. Nimin zing inkhelah pawh rin kai zawk tia sawi tur an ni lo, an hneh tak Clippers hi an match hnuhnung paruka an tlawm vawi khatna a ni hial.

James chuan, "Kan ṭanrual a, theihtawp kan chhuah vek chuan team ṭha tak kan ni thei. Tun ṭuma Clippers kan hnehna hi entirna ṭha tak chu a ni," tiin thawhhona ṭha an mamawh zual hle tih a sawi.

Nimin zing NBA regular season inkhel dangah Kyrie Irving-a point 35 leh Luka Doncic (34) te hmangin Dallas Mavericks chuan Western Conference hmahruaitu Minnesota Timberwolves chu 115-108 in an hneh.

Timberwolves hian chak an inring hman hle, minute li chauh awm tawhah Anthony Edwards-a basket hmangin 106-100 in hma an hruai. Mahse, a tawp lamah Mavericks hian point 13 ngawt an neih belh a, inkhel hmuhnawma chungnung zawk an ni.

Golden State Warriors erawh an chak lo. Warriors hian Toronto Raptors chu 33-118 in an ngam lo, Toronto chak theih nan point 37 neitu RJ Barrett a khel ṭha, tun season kal laiah match khata point a neih hnem ber ṭum a ni hial.