Wolves striker Kalajdzic a chhuak

Wolverhampton Wanderers striker Sasa Kalajdzic chuan season tawp thleng loan-a khel turin Eintracht Frankfurt a zawm - a lo khelh thiam tawh sana Bundesliga lamah a intuaihnum leh dawn.

Austria international hian August 2022 khan pound maktaduai 15-in Stuggart aṭangin Wolves hi a zawm a, mahse, Premier League club tana a match hmasa berah a khupah hliam na tak a tuar.

Tun season-ah lo kirin, kum 26 mi striker hian Wolves tan match 13 a khel tawh a, mahse, heng zinga match thumah chiah hian bul ṭanin, goal thum a khungsak.

Wolves sporting director Matt Hobbs chuan, "Sasa hi a vanduai takzet. Kan club tana a match hmasa bera a inhliam kha hliam na tak a neih hnu lawk tho a ni a, fit ṭha leh turin a thawhrim a ngai hle.

"Mahse, kan forward-te tun hnaiah an khelh ṭhat bawk si avangin a tan hun ṭha a awm thei meuh lo a, amah leh kan tana ṭha ber chu, a hriatchian sa league leh Premier League nen pawha inang tak league-a intuaihnum tura a kir leh hi a ni.

"Sasa hi goal khung tura duan reng a ni a, mahse, a hliamte avangin inrintawkna neih thar a mamawh. Frankfurt-ah season ṭha tak hmangin, season tharah kan tan player ṭangkai tak a nih theih ka beisei," a ti a, Kalajdzic chungah beiseina a nei sang.