Football legend Beckenbauer-a'n mual a liam ta

Football tana sulhnu nei ropui ber zinga mi Franz Beckenbauer chu January 7, Pathianni khan kum 78 mi niin a thi. FIFA World Cup-ah captain leh manager ni chungin Germany a champion pui a, Euro C'ship nomawi a chawi bakah Ballon d'Or dawng thei a nihna hian a ropuizia chu a nemnghet.

Der Kaiser (The emperor) hminglem an pek hial Beckenbauer an ui thu hi khawvel hmun kil tin aṭangin football association, club, player, coach leh mi langsar ṭhahnem takin social media kaltlangin an tar chhuak. Football tana mi hlu bik Mario Zagallo thih aṭanga ni hnihna lekah Beckenbauer-a'n mual a liam ve leh a, player leh coach ni chunga FIFA World Cup nomawi chawi thei pathum zingah Didier Deschamps chauh a dam ta.

Munich naupang

Franz Beckenbauer hi indopui II-na zawh lama piang a ni a, September 11, 1945 khan Franz Beckenbauer Sr. leh a nupui Antonie te nupa inkarah a piang. A pa hian football hi ngaina lo mah se kum kaw mi a nih aṭangin SC Munich '06 tan football a khel ṭan.

Beckenbauer hi a tirah chuan centre forward a ni ṭhin a, 1954 FIFA World Cup champion zinga mi Fritz Walter kha a ngaisang hle. Khawtual club 1860 Munich-ah a ṭan a, he club tana khelh hi a duhthusam pawh a ni.

Mahse, a club ṭan ber ṭhin 1860 Munich zawm loin kum 1959-ah Bayern Munich a zawm ta zawk. Hei hi a chhan chu SC Munich '06 tana a khelh laiin final an thleng a, 1860 Munich nen final-ah inhmachhawnin player ṭhenkhat nen khelmualah an intihbuai vang a ni.

Bayern siam liantu

Bayern Munich hi Germany football thuntu ni mah se Beckenbauer te hunlai chuan an la ni lo. Tuna Germany rama football inelna sang ber Bundesliga hi 24 August 1963 aṭanga ṭan kha a ni a, hetihlai chuan Bavarians hi Bundesliga hnuai chiah Regionalliga Süd-ah an la khel.

Beckenbauer hian left wing aṭangin bul a ṭan a, Bayern hi Regionalliga Süd-ah champion puiin Bundesliga khel turin a tlinpui. Bundesliga-ah pawh hun rei lote chhungin team ṭha zinga mi an ni nghal a, 1965–66 season khan DFB Pokal-ah a champion pui a, 1968–69 season-ah phei chuan a vawi khat nan a captain-na hnuaiah Bundesliga nomawi an chawi.

Bayern hian Beckenbauer hoin Bundesliga leh DFB-Pokal nomawi pali ve ve bakah European Cup vawi thum leh European Cup Winners' Cup-ah an champion bawk a, Bayern siam liantu a nihzia a lang chiang hle.

Bavarians a chhuahsan hnuah United States panin New York Cosmos chu North American Soccer League-ah vawi thum a champion pui a, Germany-ah kirin Hamburger chu Bundesliga-ah a champion pui leh bawk.

Sweeper ropui

Beckenbauer hian Bundesliga nomawi an chawi hmasak ber ṭum hian captain a ni a, player thluak ṭha bik a nih avangin midfielder aṭangin bul ṭan mah se central defender-ah hming a chher ber zawk.

An champion ṭum hian sweeper (libero) hna chu a enchhin a, modern sweeper hmuchhuaktua ngaih a ni. Beckenbauer te hun lai hi chuan player tin hi an position-ah an nghet churh a, tun lai anga position hrang hrang intlan thelh ang hi a ni ve lo.

Beckenbauer erawh defence laia awm siin tlarhma a pui ṭhin a, hei vang hian a position hi attacking sweeper ti te pawhin an sawi bawk. Hemi position ṭha taka a khelh theih chhan chu football kalhmang a hriat ṭhat vang leh a thluak ṭhat vang tiin a sawi theih.

Football legend chu

Khelmual chhunga a hnathawh lansarh lehna chu FIFA World Cup-ah a ni a, kum 1974 khan Beckenbauer-a captain-na hnuaiah West Germany a champion pui. An team-ah hian tun hnu thlenga hriat hlawh goalkeeper Sepp Maier leh striker Gerd Muller bakah Bayern president hlui Uli Hoeness te pawh an awm.

West Germany hian Beckenbauer hnuaiah nomawi an chawi satliah lo a, an hneh hi Total Football hmuchhuaktu Netherlands team an ni. Manager Rinus Michels leh captain Johan Cruyff te team an hneh ringawt hi insawi theihna tham a tling a, final-a goal hmahruai khungtu chu Aizawla training rawn pe tawhtu Johan Neeskens a ni.

Chutihrualin West Germany hian nomawi an chawi hma hian kum 1966-ah England lakah final-ah an vanduai a, kum 1970-ah pathumna an nih bawk avangin champion turin an ṭha tawk tih erawh a hriat theih.

Beckenbauer vanglai hian Germany-in World Cup chauh ni lo, Euro C'ship-ah pawh result an nei ṭha. Euro 1972-a an champion bakah Euro 1976-ah pahnihna a ni bawk.

Football a chawlhsan hnuin Beckenbauer hian West Germany a enkawl a, 1986 World Cup-ah Diego Maradona telna Argentina lakah final-ah an vanduai. Italia 90-ah erawh World Cup nomawi chawiin Maradona an vel ta thung.

Beckenbauer hian World Cup zawhah Marseille enkawlin Ligue 1 nomawi a chawipui a, hemi hnu hian Bayern Munich enkawl lehin Bundesliga leh UEFA Cup-ah a champion pui bawk.

Mi bik Beckenbauer

Beckenbauer hian West Germany tan match 103 a khel a, World Cup vawi thum khelin a sang pathumah a tel pha vek. Manager a nih hnuah pawh final a thlenpui ve ve a, nomawi a chawi hial. Player leh coach ni chunga World Cup nomawi chawi thei a ni a, mimal lawmman pawh an dawng hnem.

Ballon d'Or chawimawina ṭum hnih a dawng a, European Footballer of the Year-ah vawi hnih thlan a ni a, Ballon d'Or Dream Team leh IFFHS All-time Men's Dream Team-ah te telin mimal chawimawina ringawt hi ziah tham fe a dawng.

Beckenbauer hi Bayern-ah player leh manager a nih bakah president hna thlengin a chelh vek a, player leh manager angin World Cup nomawi a chawi ringawt lo a, kum 2006-a FIFA World Cup an thlen khan organising committee chairman a ni.

A sulhnu ropui tak avangin Beckenbauer hi football khawvelin an sun a, football an khelh chhung chu a hming a dai tawh ngai lo ang.