Wigan tan Man United an ṭha hret

Manchester United-in FA Cup fourth round lut turin League One club Wigan Athletic chu 2-0 in an hneh. DW Stadium-a inkhelah hian Diogo Dalot-a'n goal hmahruai a khung a, Bruno Fernandes-a'n second half-ah a penalty hlawhchhuah chu goal-ah a chantir bawk.

Erik Ten Hag-a hoten hnehna an chan avangin team boruak a kâng sawt dawn a, mahse an khingpui hi League One club an nih miau avangin fiahna a tling pha lo. January 14, Pathianni zan dar 10-ah hian Old Traford-ah Man United-in Tottenham Hotspur an mikhual dawn a, hei hi fiahna tak tak tur chu a ni.

Team ṭha

Man United-in AFCON vangin Andre Onana an chan dawn a, mahse Cameroon lamin Tottenham nena an inkhelh hun thleng awm an phalsak. Ten Hag-a'n FA Cup-ah second keeper Altay Bayindir tan intuai hriamna hun pe loin Onana bawk bul a ṭantir.

Dutch manager hian position dangah pawh player ṭha a luhtir a, tlarhma lama awm pawh Rasmus Hojlund, Marcus Rashford, Bruno Fernandes leh Alejandro Garnacho te an ni. Casemiro leh Lisandro Martínez ten training zawm tawh mah se squad-ah an la awm lo thung.

United ṭha zawk

Wigan Athletic-in goal chance ṭha bik an nei nghal a, Thelo Aasgaard-a'n ball ṭha bik hmu mah se keeper Onana a paltlang thei lo. Hemi hnu lamah erawh Man United-in na takin an nawr a, Rashford a nung ṭha hle.

Minute 22-naah Dalot-a'n Rashford aṭanga a ball hmuh chu box pawn aṭangin a hlai lut a, 1-0 a ni. Hemi hnu hian Man United-in inkhel an thunun zui a, Rashford-a che ṭha mah se goal a keng tel lo.

Hojlund pawhin goal khung a la harsat reng a, Garnacho cross chu hnai tak aṭangin a tauh lut lo. Danish striker Hojlund hian goalkeeper Sam Lloyd Tickle-a tih per pawh box pawnah chiah a su chhuak.

Garnacho-a'n crossbar a pet per a, first half-ah goal khat chauh hmuh a ni. Second half-ah pawh mikhual team hian pet goal an harsat. Kobbie Mainoo ball pet ṭha chu keeper Tickle-a'n a dansak a, Fernandes erawhin fing taka penalty a hmuh avangin penalty spot aṭangin minute 74-naah goal hnihna a khung.

Argentine forward Garnacho-a'n chance ṭha dang a hlah leh a, goal dang a luh belh tawh loin 2-0 in inkhel a tawp. Man United an vannei a, fourth round-ah League Two club Newport County leh National League club Eastleig inkhela chak zawk an hmachhawn dawn.

Pressure a la kiang lo

Man United hian Wigan Athletic hneh mah se pressure erawh an ngah tho. Kum 20 mi Hojlund-a'n goal a khung lo a, match 24 aṭanga goal ruk chauh a khung avangin pressure a neih belh zel. An goal khungna hi penalty bakah defender khung a nih avangin tlarhmaa player dang Rashford leh Garnacho ten tun season-ah mawhphurhna tak tak an la lo a tih theih.

Chutihrualin Man United tan chanchin lawmawm a awm. Sir Jim Ratcliffe-a'n February thlaah Man United-a neitu nihna 25% a lei dawn a, Sir Dave Brailsford chu club director thar tur a ni. Brailsford hi Man United leh Lactics inkhel entu mipui 22,870 zingah a tel a, United chief executive hlui David Gill bulah a ṭhu.

Man United hian khelmual pawn buaina an chinfel theih chuan khelmual chhung lam buaina pawhin ziaawm lam a pan a rinawm.