Player thlan bik zingah Mizo pathum

Hockey India chuan ram chhunga hockey player aṭangin India hmeihche junior team zawm tur a thlang a, heng zingah hian Mizo pathum - Lalbiaksiami, Lunglei, Lalthantluangi, Kanghmun South leh Lalrinpuii, Hnahthial te an tel.

Player thlan bikte hian training an neihna tur hmun National Centre of Excellence, SAI Bengaluru an pan tawh. January 8 aṭanga February 6 thleng training an nei dawn a, hockey khelh dan pangngai bakah taksa hrisel nan kawng hrang hranga enkawl an ni ang.

Nikum December 14-16 chhung khan Bengaluru-ah player thlanna hi neih niin, Mizo inlan pali zinga pathum an thlang. An vai hian Thenzawl SAI Center aṭanga inzir chhuak leh zirlai vek an ni.

Lalremsiami Hmar leh Lalrindiki te pawh lo chher chhuak tawhtu, coach Lalroṭhuami chuan, "Mizo tleirawl te thlan anni hi kan lawm a, an naupan lai aṭanga hockey tuipui leh thiam an ni. India rama a thiam thlan chhuah zingah pawh ṭha taka an tih theih ka beisei," tiin Vanglaini a hrilh.